Táýlik boıy qazaq tilinde habar taratady delingen telearnalardyń bulyńǵyr taǵdyry jurtshylyqty alańdatyp otyr - N. Ónerbaı
ASTANA. Naýryzdyń 31-i. QazAqparat /Qanat Mámetqazyuly/ - Táýlik boıy qazaq tilinde habar taratady delingen telearnalardyń bulyńǵyr taǵdyry jurtshylyqty alańdatyp otyr. Búgin QR Parlamenti Májilisiniń jalpy otyrysynda Úkimet basshysyna depýtattyq saýal joldaǵan Nurlan Ónerbaı osylaı málimdedi,
dep habarlaıdy QazAqparat.
Óz saýalynda depýtat jaqynda Parlament Májilisinde «Memlekettik til - el birliginiń kepili» atty alqaly jıyn ótkenin, onda til týraly túrli tolǵaýlar arqaý bolǵanyn eske saldy. Bundaı basqosýda táýlik boıy qazaqsha habar taratatyn úsh telearna týraly másele kóterilgenin aıtty. N. Ónerbaıdyń sózine qaraǵanda, táýlik boıy memlekettik tilde sóıleıtin telearna jaıyn Elbasy osydan tórt jyl buryn kótergenimen de, bul máselede naqty qadamdar atqarylmaı otyr.
«Sonaý bir jyldary mınıstrlik taǵyna otyryp-turǵan E. Ertisbaev myrza, tipti álemdik telearna jasaımyn - dep atoılasa da, aıtqandarynan qaıran bolmady. Odan soń, aqparat bıligi ult janashyry dep júrgen azamat M. Qul-Muhammedke ekinshi ret qaıta tıgende de úmitimiz aqtalar dep el alańdap edi. Ol da 2010 jyldan bastap eki birdeı ulttyq arna ashylyp, bular tek qazaq tilinde táýlik boıy habar taratatyn bolady dep edi, biraq laýazymynan aýysyp ketti. QR Úkimetiniń qaýlysymen bekitilgen QR Mádenıet jáne aqparat mınıstrliginiń 2010-2014 jyldarǵa arnalǵan strategııalyq josparynda otandyq buqaralyq aqparat quraldarynyń Qazaqstannyń damý jáne álemdegi básekege qabiletti elý eldiń qataryna kirý strategııasyn aqparattyq qoldaýdyń tıimdiligin arttyrý men keńeıtýin aǵymdaǵy jyly 85 paıyzǵa jetkizý kózdelgen. Al mınıstrliktiń resmı saıtynda salanyń strategııalyq josparynda ulttyq arnalardyń ashylýy týraly bir aýyz sóz aıtylmaǵan. Sonda, bıik minbeden aıtylǵan mınıstrdiń qurǵaq sózine senemiz be, álde resmı qujatqa senemiz be?», dedi depýtat N. Ónerbaı.
Onyń paıymdaýynsha, ana tilinde habar taratatyn ulttyq arnalar taǵdyry sóz júzinde qala beretin túri bar. Sondyqtan da, depýtat jańadan taǵaıyndalǵan mınıstrden jurtshylyq úlken úmit kútetinin jetkizdi.
«Básekeli elý eldiń qataryna aqparat salasy boıynsha biz qandaı dúnıelerimizben engeli otyrmyz, eger áli kúnge aqparat keńistigimizdi soltústiktegi kórshi eldiń jańalyqtarymen toltyrýdan asa almasaq. Buǵan dálel memlekettik telearnalarymyzdyń ózi kúni keshe jańalyqtarynyń bastaýyn Reseıde bolǵan lańkestik árekettermen bastap, aıqaılap kórsetip jatty. Al óz elimizde bolyp jatqan tabıǵat apatynyń naqty derekterin halyqqa jetkize almaı, bar bolǵany jańalyqtaryn qysqa ǵana aqparat retinde qaıyrýdan aspady», dedi N. Ónerbaı.
«Mysal retinde aıtar bolsaq, reseılik telearnalar túgel derlik eki kún boıy tolassyz Máskeýdegi lańkestik oqıǵa bolǵan orynnan úzdiksiz reportajdar júrgizip, aqyry lańkesterdiń túr sıpatyna deıin anyqtalǵany jaıynda aqparatty jurtshylyqqa jetkizip baryp, biraq toqtady. Al bizde she? Bári kerisinshe! Bálkim Qyzylaǵashtaǵy qyrǵyndy, Shyǵys Qazaqstandaǵy mal men adam qatar zardap shegip otyrǵan qaıǵyly eldi mekenderden tikeleı reportajdar túsirip, halyqqa qaz qalpynda jetkizip otyrǵanda, tabıǵattyń tosyn minezinen zardap shekken shyǵystaǵy jaǵdaıdy, aqparat quraldary ıt tartqandaı julmalap durys kórsetpeı jatyr dep, oblys ákimi keshegi Úkimet keńesindegideı ókpesin aıta almas edi?! Degenmen de, ulttyq arnalardyń taǵdyry ne bolar eken dep báribir qazaqy el alańdaýly. Qoryta aıtqanda, eń áýeli tek memleketimizdiń ishki, syrtqy jetistikterin, ultymyzdyń qýanyshy men qaıǵysyn der kezinde halyqqa jetkizip otyratyn ýáde etilgen qospasyz ulttyq telearnalar qashan ómirge keledi? Naqty jaýabyn kútemiz?», dedi ol.
