Táýlik boıy habar taratatyn úsh telearnanyń birin mádenı muramyzdy nasıhattaıtyn arna etip qurý qajet - Q. Sultanov
ASTANA. Aqpannyń 24-i. QazAqparat /Ernur Aqanbaı/ - QR Parlamenti Senatynyń depýtaty Qýanysh Sultanovtyń paıymdaýynsha, elimizde ashylýy josparlanyp otyrǵan táýlik boıy memlekettik tilde habar taratatyn úsh telearnanyń bireýin ultymyzdyń mádenı murasyn nasıhattaıtyn arna etip qurý qajet.
Senator bul pikirin búgin Astanada ótken 2009-2011 jyldarǵa arnalǵan «Mádenı mura» Ulttyq strategııalyq jobasyn júzege asyrý jónindegi Qoǵamdyq keńestiń kezekti otyrysynda aıtty, dep habarlaıdy QazAqparat.
«Keleshekte Qazaqstanda tek memlekettik tilde táýlik boıy habar taratatyn 3 birdeı telearna ashý kózdelip otyrǵanyn bilemiz. Reseıde mádenıet jaıly habar taratatyn «Kýltýra» degen telearna bar. Úsh telearnanyń bireýin mádenı muramyzdy nasıhattaıtyn, mádenıt jańalyqtaryn halyqqa jetkizetin arna retinde ashqan jón», dedi Q. Sultanov otyrysta.
Aıta keteıik, keleshekte elimizde táýlik boıy memlekettik tilde habar taratatyn úsh birdeı telearna ashý josparlanyp otyrǵanyn 2009 jylǵy jeltoqsannyń 12-de Memlekettik tildi damytý prezıdenttik qory qamqorshylyq keńesiniń otyrysynda keńes tóraǵasy, Memlekettik hatshy - Syrtqy ister mınıstri Qanat Saýdabaev aıtqan bolatyn. Q. Saýdabaevtyń atap kórsetkenindeı, olar aqparattyq-tanymdyq, áleýmettik-mádenı, tarıhı-patrıottyq baǵyttaǵy telearnalar bolady dep josparlanýda. Arnalardyń bireýin «Mádenıet», ekinshisin oqý-aǵartýshylyq baǵyttaǵy «Zerde», al úshinshisin búldirshinderge arnalǵan «Balaýsa» dep ataý kózdelip otyr. «Arnalardyń ataýyna qatysty aıtarym, bul - túpkilikti sheshim emes. Keleshekte ózderińizben birge bas qosa otyryp, jańa telearnalardyń attaryn jaqsylap oılastyrý qajet», degen bolatny sonda Q. Saýdabaev.
Al, 2009 jylǵy jeltoqsannyń 21-de bolǵan QR Parlamenti Májilisinde ótken Úkimet saǵatynda Mádenıet jáne aqparat mınıstri Muhtar Qul-Muhammed qazaq tilinde táýlik boıy habar taratatyn telearnalar Qazaqstanda sandyq júıe engizilgende baryp júzege asýy múmkin ekenin aıtqan bolatyn. «24 saǵat tolyq qazaq tilinde habar taratatyn úsh telearna týraly baspasózde birneshe márte jazyldy. Degenmen, men óz basym eshqashan kelesi jyly osyndaı úsh telearna ashylady, dep aıtqan emespin. Jalpy, bundaı telearna Qazaqstanda sandyq telearna júıesine kóshý júzege asyrylǵanda ǵana ashylýy múmkin. Al onyń qaı merzimde, qashan ashylatynyn ýaqyt kórsetedi. Biraq, bundaı arnalardyń ashylatyndyǵynda esh kúmán bolmaýy kerek», degen bolatyn Úkimet saǵatynda M. Qul-Muhammed.
Mınıstrdiń aıtýynsha, Qazaqstandaǵy respýblıkalyq jıilikte 10 arnany kórsetýge múmkindik bar bolsa, sandyq arnalar iske qosylǵanda olardyń árqaısysynyń jıiligine taǵy 7-8 telearna ashýǵa múmkindik týady. «Demek, sandyq júıe arqyly qazaqstandyq kórermenge 50-60 telearnaǵa deıin tamashalaýǵa múmkindik bolady. Qazir osy baǵyttaǵy tujyrymdama jasalýda. Bul tujyrymdama daıyn bolǵan soń ony Úkimet bekitedi. Sodan keıin baryp, tájirıbe júzinde eki-úsh óńirde 2010 jyldyń ekinshi jartysynan nemese 2011 jyly kóshirýdi josparlap otyrmyz», dedi mınıstr. Onyń aıtýynsha, sandyq telearnaǵa kóshý 1-2 jyl emes, 4-5 jyldyń merziminde júzege asatyn úderis.
