Táýligine 13 myń qońyraý shalynǵan kezder boldy - «109» qyzmetiniń basshysy
ASTANA. QazAqparat - Astana qalasyndaǵy «109 kezekshi qyzmeti» MM-niń dırektory Murat Amanshıev «109» nómirine qońyraý shalǵandar jyl sanap artyp kele jatqanyn atap ótti, dep habarlaıdy «QazAqparat» HAA tilshisi.
«Bizdiń mekeme táýligine 24 saǵat tikeleı halyqpen jumys isteıdi. Táýlik boıy 15 operator kommýnaldyq jáne turmystyq suraqtarǵa jaýap beredi. 109 qyzmeti 300 baǵyt boıynsha jumys atqarady. Astana qalasynyń ákimine de ótinishi men shaǵymdar 109 nómiri arqyly joldanyp jatady. Sonymen birge, áleýmettik jelilerde de jumysymyz qyzý», - dedi Murat Amanshıev «Smart Astana» tujyrymdamasy aıasynda júzege asyrylyp jatqan tyń jobalardy tanystyrý kezinde.
Onyń aıtýynsha, bıylǵy jyldyń 1 qańtarynan kúni keshege deıin (25 jeltoqsan) 109 nómirine 440 myń qońyraý men ótinish kelip túsken. Ótken jylmen salystyrǵanda 109 nómirine habarlasýshylardyń sany 110 myń adamǵa artqan.
«Jalǵyz statıstıkaǵa ǵana emes, sapaǵa da jumys isteımiz. Ár qońyraý boıynsha tekserý, saraptaý jumystary júrgiziledi. 1000-ǵa jýyq qońyraý baqylaýǵa alyndy. Jalpy, jumys óte qarqyndy. Sebebi, kez kelgen suraqqa jaýap berýdiń belgili bir reglamenti bar. Kelip túsken ótinimderdi biz sońyna deıin jetkizip, eń bastysy ótinim berýshiniń kelisimimen ǵana qońyraýlarda kóterilgen máseleni kún tártibinen syzyp tastaımyz», - deıdi ol.
Murat Amanshıev sonymen birge, tústen keıin mektepterde sabaq bolmaıtyny týraly búgin ǵana barsha halyqqa birinshi bolyp habar taratqan 109 qyzmeti ekenin atap ótti.
«Halyq úshin barlyq mobıldi telefondarda qońyraý shalý tegin. Astana qalasynyń bilim basqarmasy tańerteńgi aýysymǵa tańǵy altyda bir aqparat beredi. Túski 11:00-ge qaraı qaıtadan ekinshi aýysymǵa sabaqtyń bolatyny nemese bolmaıtyny týraly málimet beredi. Bizdiń qyzmette 60 operator bar. Táýligine árqıly - 800-den 2000-ǵa deıin qońyraý shalynady. Qońyraýlar men ótinimderdiń sany ásirese kóktemde kóbeıedi. Máselen, bıylǵy jyldyń kókteminde bizdiń 109 qyzmetine bir táýlikte 12-13 myńnan qońyraý túsken kúnder boldy», - deıdi Murat Amanshıev.
Ol sondaı-aq, 109 nómiri halyqqa óte yńǵaıly bolǵandyqtan, kópshilik osy qyzmetke úırenip qalǵanyn aıtady.
«Halyq kóbinese sý nemese jaryqtyń joqtyǵy, sabaqtyń bolatyny nemese bolmaıtyny týraly habarlasady. Kóshede qudyqtyń beti ashyq turyp, sol týraly shaǵym kelse biz sol qudyqty reglament boıynsha 3 saǵattyń ishinde jaýyp tastaýymyz kerek. Osydan 10 jyl buryn bar-joǵy qyzmettiń 10-15 túrimen ǵana jumys atqarsaq, bıyl qyzmettiń sany aıtyp ketkenimdeı, 300-ge deıin artyp otyr. Qyzmetterdiń sanyn arttyrý jospary bar. Astana halqynyń sany ósip bara jatqandyqtan, tıisinshe habarlasýshylardyń sany artyp barady», - dep túıdi ol.
