Táýligine myń tsentner astyq jınaǵan – SQO mehanızatory Prezıdent qolynan marapat aldy
PETROPAVL. KAZINFORM – Elý jylǵa jýyq ǵumyryn eńbekke arnaǵan soltústikqazaqstandyq Sergeı Pýstylnıkov Respýblıka kúni qarsańynda Prezıdent Qasym-Jomart Toqaevtyń qolynan ІІІ dárejeli «Eńbek Dańqy» ordenin aldy.
Shal aqyn aýdany Konovalovka eldi mekeniniń turǵyny Sergeı Pýstylnıkov 30 jylǵa jýyq ǵumyryn aýyl sharýashylyǵyna arnaǵan. 21 qazan kúni týǵan kúnin atap ótken zeınetkerge Prezıdent qolynan joǵary nagrada alý kútpegen oqıǵa bolǵan.
- Eńbegim baǵalanyp, osyndaı marapat alamyn dep tipti oılamaǵan da edim. Alǵan áserimdi sózben aıtyp jetkize almaımyn, - deıdi Sergeı Pýstylnıkov.
Shal aqyn aýdanynyń Konovalovka aýylynda turatyn Sergeı Nıkolaevıchtiń eńbek joly 1972 jyly bastalǵan. Sol ýaqyttan beri aýyl sharýashylyǵynda ter tógip keledi.
Ol Sergeevka qalasyndaǵy kásibı-tehnıkalyq ýchılışede bilim alǵan. Oqýyn aıaqtaǵan soń Gorodetskoe keńsharyna mehanızator bolyp jumysqa ornalasady. Alǵash mingen tehnıkasy SK-3 kombaıny bolǵan.
- Aýyl jastaryna ol kezde tańdaý az edi. Kóbine ne kólik júrgizýshisi, ne mehanızator bolatyn. Men osy kásipti tańdadym, – deıdi ol.
Sergeı Pýstylnıkovtyń aıtýynsha, ár naýqan mehanızatorlardan tózimdilik pen qajyr-qaıratty talap etti. Eski tehnıkanyń tilin tabý, qysqa merzimde egindi ysyrapsyz jınap alý ońaı bolǵan joq. Soǵan qaramastan, aýyl eńbekkerleri naýqan kezinde tań atqannan kún batqansha alqap basynda júrdi.
Búginde aýyl sharýashylyǵynda qoldanylatyn tehnıka áldeqaıda jańarǵan. Jumys isteýge qolaıly jaǵdaı qalyptasqanymen, mehanızator mamandyǵynyń jaýapkershiligi azaıǵan joq.
- Qazir alqaptarda múldem basqa tehnıka júr. Onymen jumys isteý anaǵurlym jeńil ári yńǵaıly. Degenmen mehanızator - qıyn kásipterdiń biri bolyp qala beredi. Tańnyń atysynan kún batqansha eńbek etý kerek. Jastardyń bul mamandyqqa kóp bara bermeıtini de sodan shyǵar, – deıdi Sergeı Nıkolaevıch.
1990 jyldary Sergeı Pýstylnıkov otbasylyq «Pýstylnıkov» sharýa qojalyǵyn qurdy. Osylaısha, kóp jylǵy tájirıbesin jeke sharýashylyqty damytýǵa jumsady.
- 1992 jyly egin óte bitik shyqty. Mol ónimdi jınap alý úshin kúni-túni jumys istedik. Eski kombaındarmen táýligine myń tsentnerden astam bıdaı bastyrǵan kezderim boldy. Sol jyly bir ózim 15 myń tonna bıdaı aldym, - dep eske alady Sergeı Pýstylnıkov.
Mol ónimdi shashaýsyz jınap alý tehnıkaǵa ǵana emes, mehanızatordyń sheberligi men jaýapkershiligine de baılanysty. Búginde tájirıbeli maman bilgenin jastarǵa úıretip júr.
Buǵan deıin Qasym-Jomart Toqaevtyń Respýblıka kúnine arnalǵan saltanatty jıynda sóılegen sóziniń tolyq mátinin jarııalaǵan edik.
