«Táýligine — 5 myń tekshe metr»: Mańǵystaýdaǵy sý tuşytý zaýytynda jańa qondyrǵy iske qosyldy
ASTANA. KAZINFORM — Mańǵystaý oblysynda «Kaspıı» sý tushytý zaýytynyń qýatyn eki esege ulǵaıtý jobasy sátti júzege asyryla bastady, — dep habarlaıdy oblys ákiminiń baspasóz qyzmeti.
25 shilde kúni táýligine 5 myń tekshe metr sý óndiretin alǵashqy qondyrǵy iske qosyldy. Aımaq basshysy Nurdáýlet Qılybaı zaýytqa baryp, jańa qondyrǵynyń jumysymen tanysty.
Memleket basshysy Qasym-Jomart Toqaevtyń tapsyrmasy boıynsha Mańǵystaý oblysynda aýyz sý tapshylyǵyn joıý baǵytynda aýqymdy jumystar júrgizilýde. Jańa qondyrǵy — Kaspıı sý tushytý zaýytyn jańǵyrtý jobasy aıasynda paıdalanýǵa beriletin qondyrǵylardyń alǵashqysy. Qalǵan tórteýi tamyz aıynyń sońyna deıin kezeń-kezeńimen iske qosylady. Osylaısha, zaýyttyń qýaty kúzge deıin eki ese artyp, óńirge 40 myń tekshe metr sý beriledi.
— Óńirdi aýyzsýmen qamtamasyz etý, sý tapshylyǵyn joıý máselesi oblys ákiminiń jiti nazarynda. Sondyqtan aımaq basshysy búgin de zaýyttaǵy jumysty baqylap, jańa qondyrǵynyń iske qosylýyna kýá boldy. Qosymsha beriletin 5 myń tekshe metr sýdy apta sońyna deıin Munaıly aýdanyna jáne Aqtaý qalasyna bólýdi josparlap otyrmyz. Jalpy bizdiń negizgi tutynýshylar — Munaıly, Qaraqııa aýdanynyń turǵyndary, sonymen qatar shildeden bastap Aqtaý qalasynyń aýmaǵyna da sý jetkizýdemiz. Qazir zaýyt qalypty jaǵdaıda jumys istep tur, — dedi «Kaspıı» sý tushytý zaýytynyń dırektory Nurlybaı Aqqulov.
Oblys ákimi zaýyt basshylyǵyna qalǵan qondyrǵylardyń da jumysyn sapaly júzege asyrýdy tapsyrdy.
Aıta keteıik, óńirdegi aýyzsý kólemin arttyrý úshin jaqynda «MAEK» JShS aýmaǵynda táýligine 6000 tekshe metr sý tushytatyn qondyrǵy iske qosyldy. «SK-A-Stroı» JShS de sý tushytý zaýytynyń qýatyn 5000-nan 9 000 tekshe metrge deıin arttyrady. Sondaı-aq tamyzdan bastap Aqtaý qalasyna táýligine qosymsha 6000 tekshe metr aýyzsý beriledi.
