Táýligine 300 tonna: Temirtaýda metall synyǵyn qaıta óńdeý baǵyty qarqyn alyp jatyr
TEMІRTAÝ. KAZINFORM — Temirtaý qalasynda metallýrgııalyq ınfraqurylymdy jańǵyrtý jáne óndiristik qýattardy keńeıtý jumystary júıeli túrde jalǵasyp keledi.
2025 jyly Qarmet kompanııasy metall synyǵyn qaıta óńdeýge arnalǵan jeke óndiristik alańyn iske qosty. Jalpy aýmaǵy 40 myń sharshy metrden asatyn bul nysan kásiporynnyń ishki shıkizat bazasyn nyǵaıtyp, óndiristik tizbektiń turaqtylyǵyn arttyrýǵa baǵyttalǵan mańyzdy qadam boldy.
Jańa óndiristik alańnyń qýattylyǵy táýligine 300 tonnaǵa deıin metall synyǵyn óńdeýge múmkindik beredi. 2025 jyldyń qyrkúıeginen 2026 jyldyń sáýirine deıingi kezeńde ottegi-konverterlik tsehqa 6 myń tonnadan astam metall synyǵy jóneltilgen. Sonyń ishinde 2026 jyldyń naýryz aıynan beri shamamen 700 tonnasy halyqtan qabyldanǵan qaıtalama shıkizat úlesine tıesili.
Kompanııa ókilderiniń aıtýynsha, bul jobanyń júzege asýy óndiristi qaıtalama resýrstarmen qamtamasyz etýdiń anaǵurlym tıimdi, ıkemdi ári basqarylatyn júıesin qalyptastyrýǵa jol ashqan.
— Metall synyǵyn qaıta óńdeýge arnalǵan óz alańymyzdy iske qosý bizge óndiristi qaıtalama shıkizatpen qamtamasyz etýdiń turaqty ári tolyq baqylaýdaǵy júıesin qalyptastyrýǵa múmkindik berdi. Búginde nysan barlyq qajetti ınfraqurylymmen qamtylǵan: qabyldaý aımaǵy, tarazylaý júıeleri, arnaıy tehnıka, gıdravlıkalyq press jáne daıyn ónimdi óndiriske jóneltýge arnalǵan logıstıkalyq sheshimder bar. Sonymen qatar biz jeke tulǵalardan da metall synyǵyn bir tonnadan bastap qabyldaımyz, esep aıyrysý birden júzege asyrylady. Bul halyq úshin yńǵaıly ári Qarmet óndiristik tsıkline qosymsha kólemdegi qaıtalama shıkizatty tartýǵa múmkindik beredi, — dep atap ótti kompanııa ókilderi.
Alańdaǵy óndiristik úderis tolyq tehnologııalyq tsıkl boıynsha uıymdastyrylǵan. Metall synyǵy aldymen qabyldanyp, ólshenip, túsiriledi. Odan keıin bastapqy suryptaýdan ótip, arnaıy tehnıkanyń kómegimen gıdravlıkalyq press ýchaskesine jetkiziledi. Munda metall synyǵy tyǵyzdalyp, tasymaldaýǵa jáne ári qaraı óndiriste qoldanýǵa yńǵaıly paket túrine keltiriledi.
Daıyndalǵan metall býmalary partııalarǵa biriktirilip, kompanııanyń óz temirjol jelisi arqyly ottegi-konverterlik tsehqa jóneltiledi. Qajet bolǵan jaǵdaıda metall synyǵyn jetkizýde mobıldi tıeý-kóterý tehnıkasy da paıdalanylady, ol materıaldy tikeleı jetkizýshi aýmaǵynan qabyldaý alańyna deıin tasymaldaýǵa múmkindik beredi.
Metall synyǵy bolat óndirisindegi negizgi shıkizat kózderiniń biri bolyp sanalady. Ottegi-konverterlik tsehta ol suıyq shoıynmen birge balqytý protsesine túsedi: metall synyǵy tolyq erip, jańa bolat quramyna aınalady. Mundaı tásil qaıtalama resýrstardy tıimdi paıdalanýǵa, syrtqy shıkizatqa táýeldilikti azaıtýǵa jáne óndiristiń úzdiksiz ári turaqty jumysyn qamtamasyz etýge múmkindik beredi.
Qarmet kompanııasy metall synyǵyn jetkizýshilermen yntymaqtastyqqa ashyq ekenin jáne zańdy ári jeke tulǵalardyń usynystaryn qarastyrýǵa daıyn ekenin málimdeıdi. Metall synyǵyn qabyldaý jáne qaıta óńdeý alańy Temirtaý qalasy, Respýblıka dańǵyly, 1 mekenjaıynda, Qaraǵandy — Astana tasjolynyń boıynda ornalasqan. Qosymsha aqparatty +7 7213 96 53 51 telefony arqyly nemese elektrondyq poshta arqyly alýǵa bolady.
Bul bastama óńirdiń ónerkásiptik áleýetin arttyryp qana qoımaı, metallýrgııalyq óndiristiń ekologııalyq tıimdiligin kúsheıtip, tuıyq tsıkldi ekonomıkanyń damýyna serpin berip otyr.
