Táýligine 15-16 saǵattan júgirdim — 600 shaqyrymdy eńsergen ýltramarafonshy

ASTANA. KAZINFORM — «Astana–Kókshetaý–Astana» baǵytymen 600 shaqyrymdyq joldy júgirip ótken ýltramarafonshy tarıhı jetistikke qalaı jetkenin baıandap berdi. Jelaıaq Raýan Ábilhanovtyń aıtýynsha, marafon bes kúnge sozylǵan.

— Álemdik rekordqa ótinish berip jatyrmyz. Biraq óz elimizdiń rekordyn jańarttym, — deıdi ol «Jibek joly» telearnasyndaǵy «Búgin LIVE» baǵdarlamasyndaǵy suhbatynda.

Kún saıyn shamamen 100 shaqyrymdy eńserý — ekiniń biriniń qolynan kelmeıtin is. Alaıda Raýan Ábilhanov mundaı qashyqtyqty baǵyndyrýǵa tózim men rýhtyń arqasynda jetkenin aıtady.

— Aldyńǵy 350 shaqyrymdyq marafonda qanshalyqty qıyn ekenin kórdim. Ol jerde de kedergiler kóp boldy. Sol tájirıbeden keıin kemshilikterdi túzetip, 600 shaqyrymdy kózdegen edim, maqsatyma jettim — deıdi marafonshy.

Ol márege súrinbeı jetý úshin óz josparyna saı táýligine 120 shaqyrym júgirýdi maqsat etkenin aıtady.

— 120 shaqyrymnan artta qalsam, ári qaraı qıyn bolatynyn túsindim. Táýliktiń 15-16 saǵatyn júgirýge, qalǵan 7-8 saǵatyn uıqy men as ishýge arnadym. Uıqy qysyp, sharshaǵan sátter kóp boldy. Biraq jol boıy adamdar ústel jaıyp, qolpashtap otyrdy. 10 shaqty áskerı qyzmetshi, synyptastarym, ata-anam men aǵalarym kelip qoldady. Sol kisilerdiń qoldaýy maǵan kúsh berdi, — deıdi Raýan.

Raýannyń aıtýynsha, bul ıdeıa oǵan burynǵy marafon kezindegi tájirıbelerden keıin kelgen. 
Buǵan deıin ol Almaty oblysynda 360 shaqyrymdy 48 saǵatta júgirip ótken. 

Kamıla Múlik