Taýlardy alasartpaı, Dalany asqaqtatty - Oljas Súleımenov
Meniń jas kúnimde jazyp, ómir boıy ustanyp kele jatqan qymbat qaǵıdam - taýlardy alasartpaı, dalany asqaqtatý. Elbasy sózi dál osy oıdyń oraıynan shyqqandyǵymen kóńil toltyryp otyr.
Nursultan Nazarbaev tarıhı sóz sóıledi. Bulaı degende men ol sózdiń tarıhqa arnalǵandyǵyn, tarıhı oqıǵaǵa baılanysty aıtylǵandyǵyn meńzep turǵan joqpyn. Prezıdenttiń bul sózi Memleket basshysynyń qazaq tarıhyn jalpy baǵalaý arqyly onyń mán-mańyzyn tereń ashyp kórsetkendigimen erekshe qundy. Elbasy qazaq memlekettiliginiń túp-tamyry óte arǵy zamandarda ekenin naqty dáleldedi.
Tarıh máselelerimen aınalysqanyma jarty ǵasyrdan asyp barady. Osy jyldarda talaı eńbekterimde memlekettiliktiń birinshi belgisi jazýy bolýy ekendigin aıtqanmyn. Meniń túrki jazýynyń bastaýlaryn qazaq dalasynan alys jerlerden izdegenim belgili. Munyń ózi bizdiń babalarymyzdyń jeti jurtpen jalǵasyp jatqan dástúrleri mol bolǵanyn bildiredi.
Juban aqyn jaqsy aıtqan, «Men qazaqpyn myń ólip, myń tirilgen» dep. Bizdiń ary-beri jóńkile kóship-qonýymyz Eýrazııanyń alyp dalasynda ártúrli memlekettilikterdiń paıda bolýymen, órkendeýimen, joǵalýymen jalǵasyp jatqan. Túrkiler sııaqty uly etnostyń jınalýsyz, qurylýsyz ómir súrýi áste múmkin emes edi. Memleket degenimizdiń basty belgisi de sol. Qazir bizdiń qaıta jınalyp, qaıta qurylyp jatqanymyzdyń mańyzy da osynda. Bul, ásirese, on segizinshi, on toǵyzynshy ǵasyrlardaǵy katastrofalardan keıin erekshe mándi.
Nursultannyń qazaq tarıhynda biz uıalatyn eshteńe joq degendi qaıtalaı aıtqany óte jaqsy boldy. Iá, tarıhymyzda biz uıalatyn eshteńe joq. Babalarymyz jaýlaýshylyq, tonaýshylyq soǵystaryn júrgizip, tarıhta qandy izin qaldyrmady. Sonymen birge, bizdiń tarıhymyzda biz qaıǵyra eske alatyn kezeńder barshylyq ekenin de umytpaýǵa tıispiz. Biz sol kezeńderde etek-jeńimizdi jınaı almaǵanymyz, basymyzdyń birikpegeni úshin qysylýǵa, sol tragedııaly tustardan taǵylym alýǵa tıispiz. Prezıdent sóziniń qýatty bir tezısi osy.
Nursultan Nazarbaev túrki dúnıesiniń tutastyǵyna da toqtaldy. «Arab kókteminen» keıin sondaı synaqty syrt kúshter túrki dúnıesine de daıyndamaıdy dep eshkim de aıta almaıdy. Osy turǵydan qaraǵanda biz túrki tildes elderdiń qýattanyp kele jatqanyna qýanamyz. Meniń dosym Geıdar Alıevtiń uly Ilham Alıevtiń basqarýymen Ázerbaıjanda óte iri ister atqarylyp jatqanyn atap ótý jón. Qarabaq qyrǵynynan keıin eldiń eńse kóterip, boı tiktep ketýi úlken jetistik. Meni aqyn retinde Nursultannyń óz memleketimizdi Uly Dala eli dep beıneli ataý jónindegi usynysy óte qýantady. Bul óte durys. Endi biz Uly Dala perzentteri degen ataqqa laıyq bolýdy oılaýymyz kerek.
