Taýlarda qar kóshkini júrýi múmkin – almatylyqtarǵa eskertý jasaldy
ALMATY. QazAqparat – Almatyda qar kóshkini júrý qaýpine baılanysty taý bókterlerine shyǵýǵa tyıym salynady, dep habarlaıdy QazAqparat tilshisi qalalyq Tótenshe jaǵdaılar departamentiniń baspasóz qyzmetine silteme jasap.
Departament taratqan málimetterge qaraǵanda, jylymyq kezde jaýyn-shashynnyń mol túsýine jáne qar jamylǵysynyń turaqsyzdyǵy men bıiktiginiń joǵary bolýyna baılanysty Úlken jáne Kishi Almaty sý alaptarynda 5 - 6 sáýir aralyǵynda qar kóshkini qaýpi saqtalady.
«Kóshkin júrý qaýpi yqtımal bolýyna baılanysty, qarly tik jartastarǵa shyǵýǵa bolmaıdy. Taýda abaı bolyńyzdar»,- delingen vedomstvanyń habarlamasynda.
Qazgıdromet aýa raıy boljamyna sáıkes 5 sáýirde tsıklon soltústik-shyǵysqa jyljyp, Qazaqstannyń basym bóligine yqpal etedi jáne soǵan baılanysty atmosferalyq aǵyndar keı jerlerde jaýyn-shashyn (jańbyr, qar), ońtústikte jáne ońtústik-shyǵysta nóser jaýyn alyp keledi. Keı jerlerde tuman túsip, kóktaıǵaq bolady, jel kúsheıip, soltústik-batysta – jaıaý burqasyn, ońtústik-batysta – shańdy daýyl soǵyp, ońtústikte jáne ońtústik-shyǵysta – naızaǵaı jarqyldaıdy.
