Taýǵa shyǵarda marshrýttardy kimge jáne qalaı tirkeý qajet
ALMATY. KAZINFORM — Almaty qalasy TJD Tótenshe jaǵdaılardy joıý basqarmasynyń basshysy Denıs ıArtsev taýdaǵy demalys kezinde saqtyq sharalary saqtalýy tıis ekenin aıtty.
Onyń sózinshe, jaz mezgilinde taýly aımaqtarǵa baratyndardyń sany artady. Osyǵan baılanysty qutqarý qyzmetteri kúsheıtilgen rejımde jumys istep, tótenshe jaǵdaılarǵa daıyndyq sharalary qolǵa alynǵan.
Almaty aýmaǵynda eki kásibı qutqarý bólimshesi — QR TJM-niń «Barys» respýblıkalyq qutqarý qyzmeti men Almaty qalalyq TJD Qutqarý qyzmeti jumys isteıdi. Taýdaǵy izdestirý-qutqarý jumystaryna 194 qutqarýshy, 60 tehnıka jáne eki tikushaq jumyldyrylǵan. Sonymen qatar Alpınızm federatsııasy men Erikti qutqarý qyzmetiniń ókilderi de kómek kórsetedi.
Týrısterdiń qaýipsizdigin arttyrý úshin taýdyń shalǵaı ýchaskelerinde jáne Almaty oblysyna jaqyn aýmaqtarda 18 taý lashyǵy ornatylǵan. Olar dári qobdıshalarymen, uıaly telefondardy qýattaıtyn qurylǵylarmen, jyly kórpelermen jáne uzaq saqtalatyn azyq-túlikpen qamtamasyz etilgen.
— Qazirgi ýaqytta tórt baqylaý-qutqarý beketi jumys isteıdi. Onyń ekeýi ótken jyly ashylǵan. Bul keıbir baǵyttarda zardap shekkenderge kómek kórsetý ýaqytyn 3-4 saǵatqa qysqartýǵa múmkindik berdi. Jalpy taýdaǵy oqys jaǵdaılardyń kóbi týrısterdiń daıyndyqsyz jolǵa shyǵýynan, aýa raıyn eskermeýinen, baǵytty aldyn ala zerttemeýinen jáne óz kúshin durys baǵalamaýynan bolady, — dedi ol.
TJD málimetinshe, 2025 jyly qutqarýshylar taýdaǵy izdestirý-qutqarý jumystaryna 410 ret shyǵyp, 608 adamdy qutqarǵan. Al osy jyldyń basynan beri 112 operatsııa júrgizilip, 189 adamǵa kómek kórsetilgen.
— Taýǵa shyǵar aldynda marshrýtty 112 qyzmeti nemese TJM-niń aýmaqtyq bólimsheleri arqyly tirkeý qajet. Bul tótenshe jaǵdaı týyndaǵan jaǵdaıda izdeý jumystaryn jedeldetip, der kezinde kómek kórsetýge múmkindik beredi, — dedi Denıs ıArtsev.
Sondaı-aq Denıs ıArtsev 2025 jyldyń qyrkúıeginen bastap Qazaqstanda qoljetimdiligi qıyn aımaqtarǵa saparǵa shyǵatyn týrıster úshin qozǵalys baǵyty týraly azamattyq qorǵaý organdaryna aldyn ala habarlaý tártibi engizilgenin eske saldy.
Buǵan deıin qutqarýshylar Almaty taýlarynda adasyp ketken eki jasóspirimge járdemdesti.
