Taýǵa ketken týrıst TJ qyzmetine habar berýge mindetteledi – Mınıstr

ASTANA. KAZINFORM – Týrızm jáne sport mınıstrligi týrısterdiń taýly aımaqtardaǵy qaýipsizdigin qamtamasyz etý maqsatynda zańnamaǵa túzetý engizýdi usynyp otyr.

Jańa norma boıynsha týrıster jetý qıyn taýly aımaqtarǵa sapar aldynda TJM bólimshelerine óz marshrýttary týraly mindetti túrde habar berýge tıis. Bul týraly mınıstr Erbol Myrzabosynov Úkimettiń búgingi otyrysynda baıandady.

Sý aıdyndarynda qaýipsizdikti qamtamasyz etý maqsatynda elimizde 700 shomylýǵa ruqsat etilgen oryn belgilendi. Qaýipti jerlerde 201 qutqarý beketi jumys istep tur.

− Taýly aımaqtarda jaǵdaı kúrdeli. Sońǵy bes jylda 400-den astam qutqarý operatsııasy júrgizildi. Tek ótken jazda 112 jaǵdaı tirkelgen. Osyǵan baılanysty, taýǵa shyqpas buryn týrısterdiń marshrýttary týraly tótenshe jaǵdaı qyzmetterine habarlaý tártibin zańnamalyq túrde bekitý qarastyrylyp jatyr, − dedi Erbol Myrzabosynov.

Mınıstrdiń aıtýynsha, Almaty taý klasteri aıasynda qaýipsizdikke arnalǵan ınfraqurylym salynyp jatyr.

− Shalǵaı taýlarda 18 úıshik ornatyldy. Onda alǵashqy kómek qobdıshasy, azyq-túlik, kórpe jáne «SOS» túımesi bar. Bul júıe birneshe adamnyń ómirin saqtap qalýǵa kómektesti. Osy tájirıbeni basqa da taýly aımaqtarǵa engizý usynylady, − dedi sala mınıstri.

«QazAvtoJol» derekteri boıynsha, respýblıkalyq joldarda 1446 servıs nysany bar. Onyń 90%-y standarttarǵa saı. 2025 jyly bul kórsetkish 100%-ǵa jetýi qajet.

Aıta keteıik, ótken jyly elimizge 15,3 mıllıon týrıst shetelden kelgen. Sondaı-aq, 10 mıllıonnan astam ishki týrıst el ishinde saıahattaǵan.

Qazaqstanǵa 87 eldiń azamaty vızasyz kele alady, taǵy 107 eldiń azamaty elektrondy vızamen kire alady.

Sondaı-aq, Qazaqstanǵa kelgen týrısterge tegin SIM-karta berý usynyldy.