Táýelsizdiktiń 35 jyldyǵyna 35 kún qaldy: Qazaqstan óńirleri merekege qalaı daıyndalyp jatyr
ASTANA. KAZINFORM — QR Táýelsizdiginiń 35 jyldyǵyna 35 kún qaldy. Memlekettik mereke qarsańynda elorda jáne óńirlerde kósheler, ǵımarattar jáne qoǵamdyq oryndar meıramǵa saı bezendirile bastady, dep habarlaıdy Kazinform tilshisi.
Bıyl Táýelsizdiktiń 35 jyldyǵyna arnalǵan resmı merekelik rámizder ázirlendi. Olar qalalyq keńistikterdi bezendirýde, sondaı-aq mereıtoıǵa arnalǵan mádenı, qoǵamdyq jáne basqa da is-sharalarda qoldanylady. Bul merekelik bastamalarǵa biryńǵaı vızýaldy stıl berýge múmkindik beredi jáne el boıynsha merekelerdiń jalpy taqyrybyn kórsetedi.
Astana ákimdiginiń málimeti boıynsha, mereke qarsańynda elordadaǵy ǵımarattar men LED ekrandar Táýelsizdik taqyrybyna oraı bezendirildi.
3D LED ekranda, aınalmaly dóńgelekte, «Qazaqstan temir joly» UK» AQ ǵımaratynyń qasbetinde jáne qalanyń basqa da kórikti jerlerinde merekelik beıneler paıda boldy.
Qyzylorda men oblystyń aýdan ortalyqtarynda da merekege daıyndyq bastaldy. Taqyryptyq sýretter LED ekrandarda, ǵımarattardyń qasbetterinde jáne aınalmaly dóńgelekte kórsetilýde.
Jetisý oblysynda da halyq kóp shoǵyrlanatyn qoǵamdyq oryndarda, atap aıtqanda, medıtsınalyq mekemelerdiń, saýda úıleri men saýda-oıyn-saýyq ortalyqtarynyń mańynda jáne kelýshiler kóp bolatyn ózge de oryndarda 21 LED-ekran iske qosyldy. Merekeik aqparattyq naýqan Taldyqorǵan qalasyn, sondaı-aq Sarqan, Aqsý, Eskeldi, Panfılov, Kerbulaq jáne Kóksý aýdandaryn da qamtydy.
Merekelik bezendirýler elimizdiń basqa aımaqtarynda da ornatyla bastady. Naqtyraq aıtqanda, Qaraǵandyda, Shyǵys Qazaqstan oblysyndaǵy Óskemende jáne Aqmola oblysynyń eldi mekenderinde taqyryptyq LED ekrandar paıda boldy.
Eske sala keteıik, Táýelsizdik kúni «Qazaqstan Respýblıkasynyń Memlekettik táýelsizdigi týraly» Qazaqstan Respýblıkasynyń zańyna sáıkes atalyp ótedi. Qazaqstan Egemendigi týraly zańdy Joǵarǵy Keńes 1991 jyly 16 jeltoqsanda qabyldaǵan bolatyn.
Táýelsizdik alý Qazaqstannyń qazirgi tarıhynyń bastaýy boldy. Ol elimizdiń derbes egemendi memleket qurýyna, ulttyq ekonomıkasy men mádenıetin damytýyna jáne táýelsiz syrtqy saıasat júrgizýine múmkindik berdi.
Eske sala keteıik, Qazaqstannyń jańa Konstıtýtsııasynda «Táýelsizdik» jáne «Egemendik» sózderi bas árippen jazyldy.
