Táýelsizdikke 33 jyl: Jetisý oblysynda 76 otbasy qonys toıyn toılady
TALDYQORǴAN. KAZINFORM — Jetisý oblysynda Táýelsizdik kúnine oraı 10 áleýmettik nysan paıdalanýǵa berildi. Sondaı-aq, 76 otbasy qonys toıyn toılady.
Jetisý oblysy ákiminiń baspasóz qyzmeti málim etkendeı, Táýelsizdik kúnine oraı halyqtyń áleýmettik osal toptary sanatyndaǵy 76 otbasy baspanaly boldy. Atap aıtqanda, Kóksý, Eskeldi, Panfılov aýdandarynda kezekte turǵan azamattar aldy.
— Qýanyshymyzdy sózben aıtyp jetkize almaımyn. Óz úıimiz bolsa degen birneshe jyldan bergi armanymyz oryndaldy. Búgin úlken otbasymyz keń, jaıly, jańa úı aldy. Memlekettiń qoldaýy men qamqorlyǵynyń arqasynda Táýelsizdik kúnin, aldaǵy Jańa jyldy endi óz úıimizde atap ótemiz, — dedi Jarkent qalasynyń turǵyny, kópbalaly ana Shynar Azatbekova.
Budan bólek, óńirde medıtsınalyq jáne veterınarııalyq pýnktter, dárigerlik ambýlatorııalar, mádenıet úıi, aýyldyq klýb jáne sport kesheni, jalpy alǵanda 10 jańa áleýmettik nysan paıdanýǵa berildi.
— Osy kúni oblystyń birqatar aýylynda jańa medıtsınalyq mekemeler esigin ashty. Máselen, Kóksý aýdanynyń 140 turǵyny bar PCh-45 stantsııasynda jańa blok-modýldik medıtsınalyq pýnkt qoldanysqa berildi. Sondaı-aq, Panfılov aýdanynyń Shejin, Kerimaǵash jáne Qyzyljıde aýyldarynda feldsherlik-akýsherlik pýnkt pen eki medıtsınalyq pýnkt salyndy, — dep atap ótti Jetisý oblysy ákiminiń baspasóz qyzmeti.
Memleket basshysy mádenıet pen ónerdi damytý memleketimiz úshin negizgi basymdyqtyń biri ekendigin alǵa qoıyp otyr. Aýyldy eldi mekenderde ashylyp jatqan osyndaı nysandar sonyń bir kórinisi.
— Eskeldi aýdanynda birden 3 jańa nysan iske qosyldy. Aýdan ortalyǵy Qarabulaq aýylynda mádenıet úıi, Aqyn Sara aýylynda 120 oryndy jańa blokty-modýldi aýyldyq klýb pen ákimdik ǵımaraty paıdalanýǵa berildi. Panfılov aýdany Úsharal aýylynda 50 oryndyq sport kesheni paıdalanýǵa berildi. Onda kúres, boks, buqaralyq sport túrleri boıynsha sektsııalar ashyldy, — delingen Jetisý oblysy ákiminiń baspasóz qyzmeti taratqan habarlamada.
Sonymen qatar, Panfılov aýdanynda alǵash ret ınvestor esebinen salynǵan «Orbulaq» halyqaralyq avtovokzaly jumysyn bastady. Vokzal avtoparkinde 31 avtobýs bar, 67 adam jumyspen qamtyldy.
Osyǵan deıin Prezıdent Qasym-Jomart Toqaev memleket talantty jastarǵa árdaıym jan-jaqty qoldaý kórsetetini týraly aıtqan edi.
Osy jyldyń qyrkúıek aıynda Memleket basshysy Jetisý oblysynyń ákimi Beıbit Isabaevty qabyldaǵan bolatyn.
Kezdesý barysynda Memleket basshysy óńirdi áleýmettik-ekonomıkalyq turǵydan damytý jáne halyqtyń ál-aýqatyn jaqsartý baǵytyndaǵy jumystardy odan ári jalǵastyrýdy tapsyrǵan edi.