Táýelsizdik jyldarynda Qazaqstanda 3 myńnan astam zań qabyldanǵan
Álemdik Digital IQ reıtıginde Qazaqstan 20-orynda. Bul týraly Senattaǵy «Parlament jumysyndaǵy tsıfrlandyrý» taqyrybyndaǵy semınarda Senat tóraǵasynyń orynbasary Jaqyp Asanov aıtty, dep habarlaıdy Kazinform.
«Bárimizge belgili, tsıfrlandyrý jaǵynan Qazaqstan óte joǵary deńgeıde. Shúkir, jetistikter barshylyq. Álemdik Digital IQ reıtıginde Qazaqstan 20-orynda. Kóptegen salalar boıynsha memlekettik organdar jaqsy damyp keledi. Osy rette Parlamentke kelsek, biz sol kóshten biraz qalyp qoıǵan jaǵdaıymyz bar. Táýelsizdik jyldarynda biz 3 myńnan astam zańdy, 10 myńnan astam zańnan keıingi aktini qabyldadyq. Osyndaı úlken zańnamalyq baza bolǵan soń onda kemshilikter de, qarama-qaıshylyqtar da bar, kerek emes qaıtalaý da az emes. Sonyń bári qoǵamǵa, adamdarǵa tipti zań shyǵarýshylarǵa da qıyndyq týǵyzyp otyr. Bul aýqymdy salany retke keltirý kerek. Sondyqtan Senattyń jobalyq keńsesi men Parlamentarızm ınstıtýty Parlamenttiń qyzmetine jasandy ıntellektini qalaı engizemiz dep ýákiletti organdarmen birneshe talqylaý ótkizdi», - dedi J. Asanov.
Bul turǵyda ol osy baǵytta álemdegi eń ozyq tájirıbeni zerdelengenin aıtty.
«Sóıtsek, jasandy ıntelektini paıdalaný jaǵynan álemde eń ozyq zań shyǵarýshy organ Grekııa parlamenti bolyp shyqty. Biz Grekııa Parlamentine kómektesken kompanııany taýyp, onyń bilikti mamandaryn Qazaqstanǵa shaqyrdyq. Bul komanda – Hellenic OCR Team dep atalady. Onyń quryltaıshysy – doktor Fotıc Fıtsılıs. Bizdiń bilýimizshe, tap osy kompanııa Grekııa Parlamentin osyndaı jetistikke jetkizgen. Olar osy aptada elordada 2 semınar ótkizedi. Birinshisi, búgin bastaldy. Onyń taqyryby – Parlament qyzmetin tsıfrlandyrý. Ekinshi semınar 26 qazanda ótedi, ıaǵnı Astana IT ýnıversıtetinde bolady. Onyń taqyryby – Jasandy ıntellektiniń zań shyǵarýshy protsesindegi róli. 26 qazanda bolatyn semınarǵa da qatysýǵa shaqyramyz. Semınardyń maqsaty – Grekııa parlamentiniń tájirıbesin tyńdap, ózimizdiń suraqtarymyzǵa jaýap alyp, keleshekte jasaıtyn qadamdarymyzdy belgilep alý. Osyndaı maqsatty aldymyzǵa qoıyp otyrmyz», - dedi Jaqyp Asanov.
