Táýelsizdik jyldary 260 mln sharshy metrge jýyq baspana salyndy
ASTANA. KAZINFORM — Elimiz egemendik alǵan jyldan beri Qazaqstanda 260 mln sharshy metrge jýyq baspana salyndy. Bul týraly Ónerkásip jáne qurylys vıtse-mınıstri Qýandyq Qajkenov málim etti.
- Kóppáterli turǵyn úılerdi basqarýǵa basa nazar aýdarý kerek, sebebi turǵyndardyń ómir súrý sapasy basqarý tıimdiligine baılanysty. 1991 jyldan beri elde 254 mln sharshy metr turǵyn úı salynyp, paıdalanýǵa berildi, ıaǵnı barlyq qarjylandyrý kózinen 2 mln 319 myń páter tapsyryldy, - dedi Q. Qajkenov Parlament Májilisi janyndaǵy Qoǵamdyq palata otyrysynda.
Bul turǵyda ol 2019 jyldan bastap turǵyn úı-kommýnaldyq sharýashylyq salasynda kóppáterli úılerdi basqarý júıesin jetildirýge baǵyttalǵan reforma júrgizilip jatqanyn eske saldy. Zańnamanyń negizgi maqsaty - menshik ıeleri arasynda ortaq múlikti basqarý jáne kútip ustaý úshin jaýapkershilikti belgileý.
Budan buryn habarlanǵandaı, bıyl Qazaqstanda 20 mln sharshy metrge tarta baspana tapsyrylady.
Sonymen qatar Ónerkásip jáne qurylys vıtse-mınıstri Qýandyq Qajkenov halyqtyń áleýmettik turǵydan álsiz toby sanatyndaǵylardy arendalyq baspanamen qamtamasyz etýge qatysty túsinik berdi.