«Táýelsizdik urpaqtary» grantynyń 30 jeńimpazy 3 mln teńgeden alady
ASTANA. KAZINFORM — Astanada Halyqaralyq jastar kúni atalyp ótti. Aıda Balaeva «Táýelsizdik urpaqtary» grantynyń jeńimpazdaryn marapattady, dep habarlaıdy QR Mádenıet jáne aqparat mınıstrliginiń baspasóz qyzmeti.
Elordaǵa elimizdiń ár óńirinen bıznes, ǵylym, mádenıet, medıa, aqparattyq tehnologııalar jáne volonterlik salalary boıynsha úzdik dep tanylǵan 30 jobanyń avtory keldi. Olardyń árqaısysyna óz ıdeıasyn júzege asyrý úshin 3 mıllıon teńge kólemindegi grant sertıfıkaty tabystaldy.
QR Prezıdentiniń Halyqaralyq jastar kúnine arnalǵan quttyqtaýyn QR Premer-mınıstriniń orynbasary – Mádenıet jáne aqparat mınıstri Aıda Balaeva oqyp berdi. Memleket basshysy quttyqtaýynda búginde elimizdiń barlyq salasynda túbegeıli reformalar júrgizilip jatqanyn atap ótti. Jalpyulttyq referendýmda halqymyz biraýyzdan qoldaǵan jańa Konstıtýtsııa aýqymdy ózgeristerge tyń serpin berip, Qazaqstannyń odan ári damýy men órkendeýine jol ashty.
– Jastardy qoldaý saıasaty memleketimiz úshin árdaıym negizgi basymdyq bolyp qala beredi. Qazirgi tańda respýblıkamyzdyń ár aımaǵynda kóptegen mektepter, sport nysandary, damý ortalyqtary salynyp jatyr. Aýqymdy jobalar qolǵa alynyp, daryndy jastarǵa jan-jaqty qoldaý kórsetilip jatyr. Búgin tabystalatyn «Táýelsizdik urpaqtary» granty – sonyń jarqyn kórinisi. «Júzden – júırik, myńnan – tulpardy» anyqtaıtyn úzdikter saıysy ozyq oıly, otanshyl, bilimdi ári eńbekqor azamattardyń basyn qosyp otyr, – delingen quttyqtaýda.
Aıda Balaeva Memleket basshysynyń quttyqtaýy jas urpaqqa kórsetilgen aıryqsha iltıpattyń ǵana emes, olarǵa artylǵan zor senim men el bolashaǵy úshin júktelgen joǵary jaýapkershiliktiń de kórinisi ekenin atap ótti.
– Memleket basshysynyń jastarǵa degen qamqorlyǵy arnaıy baǵdarlamalar men qoldaý sharalarymen ǵana shektelmeıdi. Eń bastysy – biz erteń ómir súrip, eńbek etip, eldik sheshimder qabyldaıtyn urpaq úshin búgin qandaı memleket qalyptastyryp jatqanymyzda. Prezıdenttiń strategııalyq baǵyty ýaqytsha kún tártibin emes, Qazaqstannyń bolashaqqa arnalǵan uzaqmerzimdi damý negizin aıqyndaıdy. Búginde elimizdiń jańa damý kezeńinde jastarǵa úlken senim artylyp otyr. Sebebi bilimge umtylatyn, jańa ıdeıadan qoryqpaıtyn, óz isine jaýapkershilikpen qaraıtyn jas urpaq – memlekettiń eń mańyzdy kapıtaly. Memleket basshysy jastar máselesin jeke bir salanyń sheńberinde emes, búkil memlekettik saıasattyń bolashaq ólshemi retinde qarastyrady. Prezıdent qolǵa alǵan saıası, ekonomıkalyq jáne qoǵamdyq jańǵyrýlardyń túpki maqsaty – kelesi urpaqtyń qýatty, qaýipsiz jáne ádiletti elde ómir súrýine jaǵdaı jasaý, – dedi Úkimet basshysynyń orynbasary.
Sonymen qatar Aıda Balaeva keıingi bes jylda Qazaqstanda 1,5 mıllıonǵa jýyq jas jumyspen qamtylǵanyn atap ótti. 192 myń jas kásipkerlik negizderin meńgerip, 23 myńǵa jýyq azamat óz kásibin ashý úshin memlekettik grant alǵan.
«Naýryz», «Otaý» jáne óńirlik ıpotekalyq baǵdarlamalar aıasynda 13 myńǵa jýyq jas baspanaly bolýǵa múmkindik aldy.
Aıta keteıik, 2026 jyly «Táýelsizdik urpaqtary» grantyna 2200-den astam ótinim tústi. Onyń 1745-i konkýrs talaptaryna saı dep tanylyp, qaraýǵa jiberildi. Atap aıtqanda, «Bıznes» baǵyty boıynsha – 663, «Aqparattyq tehnologııalar» boıynsha – 383, «Ǵylym» boıynsha – 218, «Mádenıet» boıynsha – 174, «Medıa» boıynsha – 158 jáne «Volonterlik» baǵyty boıynsha 149 ótinim qabyldandy.
«Táýelsizdik urpaqtary» granty talantty jastardy qoldaý maqsatynda Memleket basshysy Qasym-Jomart Toqaevtyń bastamasymen 2021 jyly taǵaıyndalǵan.
Grant júzege asyrylǵan kezeńnen beri onyń ıegeri atanǵan jas qazaqstandyqtardyń jalpy sany 153-ke jetti.
Buǵan deıin elimizdegi jastar sany 6 mıllıonǵa jýyqtaǵany belgili boldy.
