«Táýelsizdik urpaqtary» grantyna ótinim sany 34,5 paıyzǵa artty
ASTANA. KAZINFORM — Bıyl «Táýelsizdik urpaqtary» grantyna 2 myńnan astam ótinim tústi. Bul ótken jylmen salystyrǵanda 34,5 paıyzǵa kóp. Bul týraly Mádenıet jáne aqparat vıtse-mınıstri Evgenıı Kochetov Halyqaralyq jastar kúnine arnalǵan brıfıngte aıtty.
Onyń aıtýynsha, memleket jastardyń ǵylym, mádenıet, shyǵarmashylyq, qoǵamdyq qyzmet jáne jańa ındýstrııalar salasyndaǵy bastamalaryn qoldaýǵa basymdyq berip otyr.
— Bıyldyń ózinde «Táýelsizdik urpaqtary» grantyna eki myńnan astam ótinim kelip tústi. Bul ótken jylmen salystyrǵanda 34,5 paıyzǵa kóp. Úzdik otyz jobaǵa úsh mıllıon teńgeden grant beriledi. Ótinimder ǵylym, mádenıet, bıznes, IT, medıa jáne volonterlik salalardaǵy jobalardy qamtıdy, — dedi spıker.
Onyń aıtýynsha, qzir elimizde jastardyń bastamalaryn qoldaýǵa arnalǵan birneshe joba bar.
— Máselen, olardyń qatarynda «Daryn» memlekettik jastar syılyǵy, «Táýelsizdik urpaqtary» granty, Prezıdenttik arnaýly ádebı syılyq jáne «Aıboz» ulttyq ádebı syılyǵy bar. Sonymen qatar jastardyń kreatıvti ındýstrııadaǵy múmkindikterin keńeıtýge de kóńil bólinip otyr. Óńirlerde kreatıvti ortalyqtar ashylyp, Kreatıvti ındýstrııany damytý qory jumysyn bastady. Sala ókilderine «Bolashaq» baǵdarlamasy arqyly bilim alý jáne taǵylymdamadan ótý múmkindigi berildi, — Evgenıı Kochetov.
Onyń dereginshe, búginde kreatıvti ındýstrııa salasynda 46 myń shaǵyn jáne orta kásipkerlik sýbektisi jumys isteıdi. Bul salada shamamen 156 myń adam eńbek etedi.
Aıta keteıik, buǵan deıin Qazaqstanda keıingi eki jylda 22,6 myń jas azamat óz kásibin bastaý úshin qaıtarymsyz memlekettik grant alǵany habarlandy.
