«Táýelsizdik urpaqtary» grantyna kimder qatysa alady?

QR Mádenıet jáne aqparat mınıstrligi 26 qyrkúıekte Memleket basshysy taǵaıyndaǵan «Táýelsizdik urpaqtary» grantyna konkýrs jarııalady, dep habarlaıdy QazAqparat.

Konkýrstyń basty maqsaty belsendi shyǵarmashyl jastar qaýymdastyǵyn qalyptastyrýǵa baǵyttalǵan jastardyń jańa jáne qoldanystaǵy bastamalaryn memleket tarapynan qoldaý.

2023 jyly «Táýelsizdik urpaqtary» boıynsha 3 mln teńgeden 30 grant beriletin bolady.

Konkýrsqa Qazaqstan Respýblıkasynyń on tórt jastan bastap, otyz bes jasqa deıingi azamattary úmitker bola alady.

Granttar 5 baǵyt boıynsha beriledi:

• «Ǵylym» – ǵylymnyń basym sektorlarynda jańa ǵylymı jobalardy jáne zertteýlerdi iske asyrýǵa arnalǵan;
• «Mádenıet» – Qazaqstannyń mádenı murasyn tanymal etýge, halyqtyq mádenı dástúrler men ónerdi ilgeriletýge baǵyttalǵan jobalardy iske asyrýǵa arnalǵan;
• «Aqparattyq tehnologııalar» – jańa IT sheshimder men jobalardy, onyń ishinde jańadan bastalǵan startap jobalardy iske asyrýǵa jáne ázirleýge arnalǵan;
• «Bıznes» – ekonomıkanyń basym sektorlarynda jańa bıznes-ıdeıalardy iske asyrýǵa arnalǵan;
• «Medıa» – jańa medıa jobalardy, onyń ishinde jastar úshin tanymdyq, paıdaly, qyzyqty kontent qurý jónindegi jobalardy iske asyrýǵa arnalǵan.

Úmitkerlerdiń konkýrstyq ótinimderi 26 qyrkúıekten 26 qarashaǵa deıin elektrondyq nusqada [e-mail] poshtasy arqyly qabyldanady.

Konkýrstyq ótinimder memlekettik jáne (nemese) orys tilderinde qabyldanady jáne:

1) 1-qosymshaǵa sáıkes nysan boıynsha konkýrstyq ótinim;

2) 2-qosymshaǵa sáıkes nysan boıynsha jobanyń sıpattamasy;

3) joba boıynsha (60 sekýndtan aspaıtyn) beınematerıal nemese (10 slaıdtan aspaıtyn) prezentatsııa;

4) 3-qosymshaǵa sáıkes nysan boıynsha shyǵyndar smetasynyń jobasy;

5) PDF formatyndaǵy zııatkerlik menshik týraly málimetter (bar bolsa);

6) PDF formatyndaǵy jeke kýálik nemese týý týraly kýáliktiń kóshirmesi bolýy tıis.

Baılanys nómiri: 8 [phone].

Tolyǵyraq: https://www.gov.kz/memleket/entities/mam/press/news/details/625498?lang=kk