«Táýelsizdik urpaqtary» grantyna qalaı qatysýǵa bolady
ASTANA. KAZINFORM — 2026 jyly «Táýelsizdik urpaqtary» granty aıasynda 30 jasqa 3 mln teńgeden qarjy beriledi. Bul týraly Ortalyq kommýnıkatsııalar qyzmetinde ótken baspasóz máslıhatynda QR Mádenıet jáne aqparat mınıstrligi Jastar jáne otbasy isteri komıtetiniń tóraǵasy Qaırat Qambarov málimdedi.
Onyń aıtýynsha, konkýrs eki kezeńnen turady. Aldymen ótinimder qabyldanyp, qaralady. Keıin jobalar baǵalanyp, arnaıy komıssııa jeńimpazdardy anyqtaıdy. Ótinimder elektrondyq formatta arnaıy Google-forma arqyly qabyldanady. Silteme mınıstrliktiń resmı saıtynda jáne aqparattyq resýrstarynda jarııalanady. Qujat qabyldaý 21 maýsymǵa deıin jalǵasady.
Qatysýshylar ótinim nysanyn toltyryp, qajetti qujattardy qosa usynýy tıis. Belgilengen merzimnen keıin jiberilgen ótinimder qaralmaıdy.
— Konkýrs qorytyndysy boıynsha jyl sońyna deıin 30 adamǵa 3 mln teńgeden grant beriledi. Tolyq aqparatty Mádenıet jáne aqparat mınıstrliginiń resmı saıtynan jáne áleýmettik jelidegi paraqshalarynan alýǵa bolady, - dedi komıtet tóraǵasy.
Sonymen qatar 2026 jyly óńirlerde jalpy somasy 215 mln teńge bolatyn 184 grant berý josparlanyp otyr.
Aıta keteıik, «Táýelsizdik urpaqtary» granty QR Úkimetiniń qaýlysymen 2021 jyly taǵaıyndaldy. Grant berýdegi maqsat – belsendi shyǵarmashyl jastar qaýymdastyǵyn qalyptastyrý, jastardyń jańa jáne qoldanystaǵy bastamalaryn memlekettik qoldaý. Onyń mólsheri men sanyn Úkimet jyl saıyn belgileıdi.
Sondaı-aq buǵan deıin volonterlik bastamalarǵa arnalǵan grant baıqaýy bastalǵanyn jazǵanbyz.
