«Táýelsizdik urpaqtary» grantyn taǵaıyndaý jónindegi komıssııanyń qorytyndy otyrysy ótti
Otyrysta QR Premer-Mınıstriniń orynbasary – Mádenıet jáne aqparat mınıstri Aıda Balaeva jastardy qoldaý Memleket basshysy Qasym-Jomart Toqaev júrgizip otyrǵan memlekettik saıasattyń strategııalyq basymdyqtarynyń biri ekenin atap ótti. Prezıdenttiń mańyzdy bastamalarynyń biri – daryndy qazaqstandyq jastardy qoldaýǵa, olardyń áleýetin damytýǵa, sondaı-aq áleýmettik mańyzy bar jáne ınnovatsııalyq jobalardy júzege asyrýyna jaǵdaı jasaýǵa baǵyttalǵan «Táýelsizdik urpaqtary» granty.
– Jyl saıyn baıqaýdyń barlyq baǵyty boıynsha ótinimder sany artyp keledi. Bul jastardyń belsendiliginiń ǵana emes, olardyń memlekettik qoldaýǵa senim bildirip, qabyldanatyn sheshimderdiń ádildigine úmit artatynynyń aıqyn kórinisi. Іriktelgen árbir joba elimizdiń maqtanyshyna aınalyp, Qazaqstan qoǵamyna naqty paıdasyn tıgizsin, – dedi Úkimet basshysynyń orynbasary.
Konkýrstyq komıssııa quramyna belgili ǵalymdar, mádenıet qaıratkerleri, medıamenedjerler, memlekettik organdar men bıznes ókilderi endi.
Aıda Balaeva komıssııa múshelerine atqarǵan jumystary úshin alǵys aıtyp, olardyń ádil ári negizdi sheshim qabyldaǵanyna senim bildirdi. Otyrys qorytyndysy boıynsha konkýrstyq irikteý barysynda alty baǵyt boıynsha eń joǵary ball jınaǵan 30 jeńimpaz anyqtaldy.
Mádenıet jáne aqparat mınıstrligi málimetinshe, grant ıegerleriniń árqaısysyna óz jobasyn júzege asyrý úshin 3 mln teńge kóleminde memlekettik qoldaý kórsetiledi.
2026 jyly baıqaýǵa 2200-den astam ótinim kelip tústi. Onyń ishinde 1745 ótinim konkýrstyq qaraýǵa jiberildi. Atap aıtqanda, «Bıznes» baǵyty boıynsha – 663, «Aqparattyq tehnologııalar» – 383, «Ǵylym» – 218, «Mádenıet» – 174, «Medıa» – 158, «Volonterlik» baǵyty boıynsha 149 ótinim qabyldandy.
Grant júzege asyrylǵan kezeń ishinde ony 183 qazaqstandyq jas ıelendi. Atap aıtqanda, 2021 jyly 30, 2022 jyly 33, al 2023, 2024, 2025 jáne 2026 jyldary jyl saıyn 30 granttan taǵaıyndaldy. 2026 jylǵy «Táýelsizdik urpaqtary» granty jeńimpazdaryn saltanatty marapattaý rásimi Halyqaralyq jastar kúnin merekeleý aıasynda Astana qalasynda ótedi.
Aıta keteıik, Jastardyń tyń ıdeıalaryn qoldaý, olardyń túrli saladaǵy bastamalaryn damytý maqsatynda júzege asyrylyp kele jatqan «Táýelsizdik urpaqtary» granty sońǵy jyldary eń suranysqa ıe memlekettik jobalardyń birine aınaldy.
