«Táýelsizdik urpaqtary» – 2025: Aıda Balaeva jeńimpazdardy marapattady
ASTANA. KAZINFORM – Búgin Astanada bıylǵy «Táýelsizdik urpaqtary» grantynyń jeńimpazdaryn marapattaý rásimi ótti. Eldiń túkpir-túkpirinen bıznes, ǵylym, mádenıet, medıa, aqparattyq tehnologııalar jáne volonterlik saladaǵy otyz úzdik jobanyń ıeleri elordaǵa jınaldy.
Mádenıet jáne aqparat mınıstrligi málimetinshe, ár jeńimpazǵa 3 mıllıon teńge kóleminde grant sertıfıkaty tabystaldy.
Jeńimpazdardy Premer-mınıstr orynbasary – Mádenıet jáne aqparat mınıstri Aıda Balaeva quttyqtady. Ol jastardy qoldaý memlekettik saıasattyń basym baǵyttarynyń biri ekenin atap ótip, barlyq bastama jas urpaqtyń bolashaǵy úshin júzege asyrylyp jatqanyn tilge tıek etti.
– Qyzylordada ótken Ulttyq quryltaıda Memleket basshysy el damýynyń aldaǵy baǵytyn aıqyndap, jańa kezeńniń strategııalyq mindetterin naqtylap berdi. Qazirgi qabyldanyp jatqan sheshimder men júzege asyp jatqan reformalar jastarǵa sapaly bilim alyp, óz áleýetin tolyq iske asyrýǵa, básekege qabiletti, sanaly azamat bolyp qalyptasýyna múmkindik beredi. Sondyqtan bul tarıhı kezeń – tek ózgerister ýaqyty ǵana emes, bolashaqqa degen senimdi nyǵaıtatyn, jańa múmkindikterge jol ashatyn mańyzdy dáýir dep aıtýǵa tolyq negiz bar, – dep atap ótti vıtse-mınıstr.
Aıda Balaeva jeńimpazdardy quttyqtap, jańa bastamalaryna tabys tiledi. Sondaı-aq ol jastardy yntalandyrý men qoldaýǵa baǵyttalǵan basqa da jobalar týraly aıtty. Olardyń qatarynda «Daryn» memlekettik jastar syılyǵy, jas jazýshylar men aqyndarǵa arnalǵan Prezıdenttiń arnaıy ádebı syılyǵy, jýrnalısterge arnalǵan «Úrker», «Jyl volonteri» halyqaralyq syılyǵy bar.
Aıta keteıik, «Táýelsizdik urpaqtary» granty Memleket basshysynyń bastamasymen daryndy ári bolashaǵynan úmit kúttiretin jastardy qoldaý maqsatynda 2021 jyly qurylǵan. Osy ýaqytqa deıin atalǵan grant 123 qazaqstandyqtyń ıdeıasyn iske asyrýǵa jáne damytýǵa múmkindik berdi.
Bıyl konkýrsqa 6 baǵyt boıynsha 1700 ótinim kelip tústi, onyń 1622-si qabyldandy. Olardyń qatarynda Qazaqstannyń mádenı murasyn men ulttyq dástúrlerdi nasıhattaýǵa, mádenıet pen ónerdi damytýǵa, ǵylymı zertteýler júrgizýge, IT jáne volonterlik saladaǵy startaptarǵa, sondaı-aq kreatıvti bıznes-ıdeıalarǵa baǵyttalǵan jobalar bar.
«Táýelsizdik urpaqtary» grantynyń jeńimpazdary anyqtalǵanyn jazǵan bolatynbyz.