Táýelsizdik merekesine oraı Túrkistan oblysynda 600 oryndyq jańa mektep ashyldy
TÚRKІSTAN. KAZINFORM — Saıram aýdany, Mankent aýyldyq okrýgindegi «Aınabulaq» negizgi orta mektebi el ıgiligine berildi. 600 orynǵa shaqtalǵan bilim uıasy oblystyq bıýdjet esebinen salyndy.
Bilim ordasynyń oqý ǵımaraty 3 qabattan turady. Zamanaýı úlgide salynyp, materıaldyq-tehnıkalyq bazasy talapqa saı jabdyqtalǵan. Mektepte ashana, oqý jáne zerthana bólmeleri, sport zaly sońǵy úlgide jasalǵan. Uldar men qyzdarǵa arnalǵan sheberhanasy men arnaıy dárigerlik kabınet qarastyrylǵan. Informatıka men robototehnıka synyptary da bar.
Bilim ordasynyń ashylý saltanatyna qatysqan oblys ákimi Darhan Satybaldy turǵyndardy qos merekemen quttyqtap, ustazdar men oqýshylarǵa sáttilik tiledi.
— Búgin qýanyshty sátte jolyǵyp turmyz. El Prezıdenti bilim salasyna qoldaý kórsetý, aýyldardy damytý jóninde tapsyrma bergen bolatyn. Óńirde osy baǵytta qarqyndy jumys júrýde. Bul mektepte bilim alýǵa barlyq jaǵdaı jasalǵan. Munyń bári ósip kele jatqan urpaqtyń ıgiligi úshin istelip jatyr, dep atap ótti oblys ákimi Darhan Satybaldy.
Aıta keteıik, Túrkistan oblysynda bıyl 50 mekteptiń qurylys jumystary júrgizilip jatyr. Onyń 29-y «Jaıly mektep» jobasy aıasynda salynyp jatyr. «Jaıly mektep» jobasy arqyly 2 mektep tapsyrylyp úlgerdi.
