Táýelsizdik kúnine oraı Shymkentte jańa órt sóndirý deposy ashyldy
Shymkent qalasynda Táýelsizdik kúni qarsańynda jańa órt sóndirý deposynyń saltanatty ashylý rásimi ótti, dep habarlaıdy Kazinform Tótenshe jaǵdaılar mınıstrliginiń baspasóz qyzmetine silteme jasap.
Ashylý saltanatyna qala ákiminiń orynbasary Aıdyn Kárimov, azamattyq qorǵaý organdarynyń ardagerleri jáne qurmetti qonaqtar qatysty.
Jańa órt sóndirý beketi eskiniń ornyna jergilikti atqarýshy organdardyń qarajaty esebinen salyndy. Qazirgi zamanǵy talaptarǵa saı órt sóndirý deposy jalpy aýdany 1300 sharshy metrden asatyn 4 avtomobılge eseptelgen. Qoldanysqa berilgen bul depo órt qaýipsizdigin qamtamasyz etý boıynsha jumys pen den qoıý tıimdiligin arttyrýǵa múmkindik beredi, sondaı-aq qyzmetkerlerdiń qyzmet atqarýy úshin qolaıly jaǵdaılar jasalǵan.
Jańa órt sóndirý deposy órtterdi sóndirý jáne túrli avarııalyq-qutqarý jumystaryn aýqymdy kólemde oryndaýǵa qabiletti zamanaýı úlken tehnıkany ornalastyrýǵa múmkindik beredi. Órt sóndirý bóliminde 68 qyzmetker jumys isteıdi. Jeke quram úshin oqý synyby, demalys, jatyn bólmeleri, as úı, akt zaly, sport zaly, tehnıkalyq jáne ákimshilik úı-jaılar qarastyrylǵan.
Búginde qalada 10 órt sóndirý bólimi jumys isteıdi. Ieliginde 114 birlik órt sóndirý tehnıkasy bar, kún saıyn jeke quramnan 150 jýyq adam táýliktik kezekshilikke shyǵady.
Esterińizge sala keteıik, osy jyldyń qarasha aıynda Shymkentte ákimshilik iskerlik ortalyqta jańa órt sóndirý deposy iske qosyldy. Sonymen qatar Saıram turǵyn alabynda órt sóndirý deposynyń qurylysy júrgizilip jatyr.
