Táýelsizdik kúnine oraı Ózbekstan prezıdenti 522 adamǵa raqymshylyq jasady

TAShKENT. KAZINFORM – Táýelsizdik kúni qarsańynda Ózbekstan prezıdenti Shavkat Mırzıeev «Jazasyn ótep jatqan, istegen isine ókinetin jáne ómirin ózgertýge bet alǵan adamdar tobyna raqymshylyq jasaý» jarlyǵyna qol qoıdy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

«UzA» aqparat agenttiginde jarııalanǵan prezıdent jarlyǵyna saı, 522 adamǵa raqymshylyq jasaldy. Olardyń ishinde 159 sottalǵan negizgi jazasyn óteýden tolyq bosatylsa, 303 adamnyń shartty jazasy kúshin joıady. Sonymen qosa, 60 adamnyń jazasy jeńildeıdi.

Raqymshylyq jasalǵandardyń qatarynda shet memleketterdiń 19 azamaty, 56 áıel, 60 jastan asqan 25 er adam, 233 jas (onyń ishinde bireýi kámeletke tolmaǵan), sondaı-aq tyıym salynǵan uıymdardyń qyzmetine qatysqan 27 adam bar.

Jarlyqty oryndaý sheńberinde jaýapty vedomstvolarǵa raqymshylyq alǵan adamdardy otbasyna qaıtarý, olardyń qoǵamǵa beıimdelýine járdemdesý jáne jumysqa ornalastyrý jóninde tapsyrmalar berildi.