Táýelsizdik kúnine oraı Batys Qazaqstan oblysynda medıtsınalyq nysan ashyldy
Prezıdent Qasym-Jomart Toqaevtyń tapsyrmasyna sáıkes Úkimet qaýlysymen ótken jyldyń sońynda «Aýylda densaýlyq saqtaýdy jańǵyrtý» pılottyq ulttyq jobasy aıasynda 2023-2025 jyldary Batys Qazaqstan oblysynda 50 medıtsınalyq nysan salý josparlanǵan. Búgingi kúni bıylǵa josparlanǵan 12 nysannyń 5-eýi halyq ıgiligine berildi, dep habarlaıdy Kazinform.
Búgin Táýelsizdik kúni merekesi qarsańynda Terekti aýdanyna qarasty Saryómir aýylynda BQO ákimi Narıman Tóreǵalıev qatysýymen 6-shy nysan halyqtyń ıgiligine berildi. Bul nysandy salýǵa respýblıkalyq bıýdjetten 374 mln teńgege jýyq qarajat bólindi. Qurylys merzimi 4 aı bolsa da, «Fırma ISKOM» JShS merdiger kompanııasy belgilengen merzimnen erte aıaqtady.
Atalǵan dárigerlik ambýlatorııa kúnine 35 adam qabyldaı alady, zamanaýı medıtsınalyq quraldarmen jabdyqtalǵan, aýyl turǵyndar arasynda 22 adam turaqty jumyspen qamtylady. Dárgerlik ambýlatorııa emdeý-profılaktıkalyq obektisi sanalady, ishinde jalpy dárigerlik-profılaktılyq dáriger kabıneti, protsedýralyq, fızıoterapevttik, tis emdeıtin kabınetter, akýsher-gınekolog kabıneti, zerthanalar men dárihana, sonymen qatar deni saý balanyń kabıneti jáne taǵy da basqa qarastyrylǵan.
Jalpy bıyl oblysymyzda densaýlyq saqtaý júıesin qarjylandyrýǵa 92 mlrd. teńge qarastyryldy. Osy jyly 5,5 mlrd. teńgege medıtsınalyq jabdyq satyp alý josparlanǵan. Qazirgi tańda 204 birlik medıtsınalyq jabdyq alyndy. Sondaı-aq oblysta medıtsınalyq uıymdarǵa jergilikti bıýdjet esebinen 1,7 mlrd teńgeden astam qarajat bólinip, 81 jedel járdem avtokóligi satyp alyndy.
Jalpy somasy 1 mlrd, 733 mln teńgege jýyq qarjyǵa 22 densaýlyq saqtaý nysanyna kúrdeli jóndeý jumystary júrgizilýde, onyń ishinde «Aýyl-el besigi» jobasy aıasynda 6 nysan bar. 18 nysan boıynsha jóndeý jumystary aıaqtaldy.
Óńir basshysy aýyl turǵyndaryn el damýyna, ultymyzdyń densaýlyǵy zor bolýyna, ómir sapasyn arttyrýǵa baǵyttalǵan jańa nysannyń ashylýymen jáne kele jatqan Táýelsiz kúnimen quttyqtaı otyryp, tarıhı mańyzdylyǵyna toqtap, elimizge bereke-birlik, ár otbasylaryna amandyq tiledi.
