Táýelsizdik kúninde Qyzylorda oblysynda eki dárigerlik ambýlatorııa ashyldy
QYZYLORDA. KAZINFORM - Búgin oblys ákimi Nurlybek Nálibaevtyń qatysýymen Táýelsizdik kúnine oraı Shıeli aýdanynyń «Tartoǵaı» jáne «Almaly» aýyldarynda dárigerlik ambýlatorııa ashyldy.
Saltanatty jıynǵa oblystyq máslıhat tóraǵasy Murat Tileýimbetov, zııaly qaýym ókilderi, jaýapty sala basshylary men aýyl turǵyndary qatysty.
Aımaq basshysy jurtshylyqty merekemen quttyqtap, jańa nysandardyń el ıgiligine qyzmet etetinine senim bildirdi.
- Barshańyzdy elimiz úshin aıtýly mereke - Táýelsizdik kúnimen quttyqtaımyn! Ultymyzdyń qasıetti de qasterli merekesi kúni «Tartoǵaı», «Almaly» aýyldarynda «Aýyldyq densaýlyq saqtaýdy jańǵyrtý» ulttyq jobasy aıasynda salynǵan jańa dárigerlik ambýlatorııany el ıgiligine tabystaýǵa jınaldyq. Prezıdentimizdiń, Úkimettiń erekshe qoldaýynyń arqasynda aımaǵymyz baıypty bastamalar men jasampaz jobalardyń ordasyna aınalyp jatyr. Ótken 11 aıdyń qorytyndysyna qarasaq, óńirimiz barlyq negizgi makroekonomıkalyq kórsetkishter boıynsha respýblıkada aldyńǵy qatarda. Oblys bıýdjeti 750 mlrd teńgeden asty. Osydan eki jarym jyl buryn aımaq bıýdjeti 364 mlrd teńge bolatyn. Ósim 206 paıyz boldy. Deni saý urpaq – Ádiletti Qazaqstannyń keleshegi. Ult saýlyǵyn nyǵaıtyp, aýyl halqyna sapaly medıtsınalyq qyzmet kórsetý – memlekettiń basty mindetteriniń biri. Jańa ǵımarat barshańyzǵa qutty bolǵaı! Elimiz eńseli, tirligimiz berekeli, Táýelsizdigimiz máńgi bolsyn! - dedi N.Nálibaev.
Rásimde oblystyq ardagerler keńesiniń tóraǵasy Serik Dúısenbaev, Qazaqstan Respýblıkasynyń eńbek sińirgen qaıratkeri Qorǵanbek Qaırýllaev bata berip, eńbek ardagerleri, dárigerlik ambýlatorııalardy salǵan qurylysshylar oblys ákiminiń Alǵys hatymen marapattaldy.
Bıyl oblystyń densaýlyq saqtaý salasynyń bıýdjeti 146 mlrd 200 mln teńgege jetti.
Ulttyq jobamen barlyq aýdanda 27 medıtsınalyq nysan salynýy josparlanyp, ótken jyly 15 jańa dárigerlik ambýlatorııa, 1 medıtsınalyq beket paıdalanýǵa berildi.
Bıyl 9 dárigerlik ambýlatorııa, 2 feldsherlik-akýsherlik beket iske qosylady. Onyń ishinde, Shıeli aýdanynda 3 dárigerlik ambýlatorııa Dosbol bı, Bala bı, «Bulanbaı baýy» aýyldarynda salyndy. Qalǵan 11 nysannyń qurylysy aıaqtalyp jatyr.
Búgin «Tartoǵaı», «Almaly» aýyldarynda jańa dárigerlik ambýlatorııalar ashylsa, «Ortaqshyl», Tájibaev, «Bestam» eldi mekenderindegi medıtsınalyq nysandar jaqyn kúnderi el ıgiligine tabystalady.
