Táýelsizdik kúni merekesinde ınternet nege nasharlady – mınıstr jaýaby

ASTANA. KAZINFORM – Táýelsizdik kúni merekesinde elimizde ınternet baıaý ustady. Aıta keteıik, bul merekede qazaqstandyqtar úsh kún demaldy.

Búgin Úkimettiń tsıfrlandyrý jáne jasandy ıntellekt taqyrybyna arnalǵan kóshpeli otyrysynan keıin BAQ ókilderi Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıevten Táýelsizdik kúni merekesinde baıaý ınternetke qatysty saýal joldady. 

- Internet boıynsha kez kelgen aqaýǵa avtomatty túrde áreket etemiz. Aldaǵy merekede aqaý bolmaıdy dep oılaımyz. Mende ınternettiń nasharlaýy mıtıngimen baılanysty degen aqpar joq, - dedi Jaslan Mádıev 

Osy oraıda jýrnalıster mınıstrden ınternettiń tómendeýiniń, durys ustamaýynyń naqty sebebin surady. 

- Elimizde kóptegen málimetter bazasy bar, olardyń barlyǵy bir-birimen biriktirilgen. Bul tehnologııalardyń artynda aýqymdy suranystar men protsester jatyr. Sondyqtan ınternet boıynsha aqaý kez-kelgen uıymda, bankte, memlekettik organda nemese kez-kelgen elde bolýy múmkin. Biz bul máselege tez áreket etip, jyldam sheshtik, adamdar aqaýdan 3-4 kún boıy ınternetsiz qalǵan joq. Ár jaıt boıynsha reportaj daıyndaıtyn tıisti mamandar bar jáne aldaǵy ýaqytta mundaı qatelikter qaıtalanbaýy úshin sharalar qabyldanýda, - dep tolyqtyrdy mınıstr. 

Aıta keteıik, bıyl Qazaqstan ınterneti eń arzan elder tizimine endi.