Táýelsizdik kúni kólikterdi zańsyz toqtatqan polıtseıler jaýapkershilikke tartylady
ASTANA. KAZINFORM – Іshki ister mınıstrligi Táýelsizdik kúni kólikterin Qazaqstan týymen bezendirgen kólikterdi zańsyz toqtatýǵa baılanysty derekterdi tekserip jatyr. Bul týraly ІІM ÁPK-niń erekshe tapsyrmalar jónindegi aǵa ınspektory Aqtoty Boranova aıtty.
Qazaqstan Respýblıkasynyń Táýelsizdik kúni merekesine oraı birqatar júrgizýshi kólikterin Memlekettik týmen bezendirip, jolǵa shyǵyp, ózderiniń azamattyq ustanymy men patrıottyq sezimderin kórsetti.
— Quqyqtyq turǵydan memlekettik týdy kólikke ornalastyrǵany úshin jaýapkershilik qarastyrylmaǵan, biraq qaýipsizdik talaptary men Jol júrisi qaǵıdalaryn saqtaý mindetti. Biraq keıbir azamattar merekelik sharalar barysynda jol qozǵalysy erejelerin buzyp, basqa qatysýshylarǵa kedergi jasap, kóshelerdi jaýyp tastady. Osyǵan baılanysty polıtsııa qyzmetkerleri zańǵa sáıkes shara qabyldaýǵa májbúr boldy, — dedi Aqtoty Boranova.
Mysaly, 16 jeltoqsanda Shymkent jáne Almaty qalalarynda polıtsııa qyzmetkerleri kólikterge tý ilgen, alaıda jol erejelerin buzǵan birneshe kólikti toqtatty.
— Tekserý nátıjesinde júrgizýshiler kólikti basqarý quqyǵynsyz júrgizgeni, apattyq jaǵdaı týǵyzǵany jáne kólikti zańsyz jabdyqtaǵany úshin ákimshilik jaýapkershilikke tartyldy. Bul sharalardyń Memlekettik týdy paıdalanýǵa qatysy joq.
Sonymen qatar Almaty qalasynda polıtsııa qyzmetkerleri sharlarmen bezendirilgen qoǵamdyq kóliktiń júrgizýshisi men jolaýshylaryna olardyń adam ómiri men densaýlyǵyna qaýipti ekenin túsindirdi. Sondaı-aq kólikti zańsyz toqtatýǵa baılanysty derekter tekserilip jatyr. Kináli polıtsııa qyzmetkerleri qatań tártiptik jaýapkershilikke tartylady.
Polıtsııa memlekettik rámizderge qurmetpen qaraıdy jáne azamattardy Jol qozǵalysy erejelerin saqtaýǵa, tek resmı málimetter men aqparat kózderine senýge shaqyrady, — dedi ІІM ÁPK-niń erekshe tapsyrmalar jónindegi aǵa ınspektory Aqtoty Boranova.
Aıta ketelik Almatydaǵy Jeltoqsan kóshesindegi BRT iske qosylǵannan keıin júrgizýshilerge aıyppul salyna bastady.