Táýelsizdik kúni qarsańynda Almaty oblysynda jańa ortalyq ashyldy
QONAEV. KAZINFORM – Almaty oblysynda halyq sany men jastar úlesi eń joǵary sanalatyn Qarasaı aýdanynda Táýelsizdik kúni qarsańynda Jastar resýrstyq ortalyǵynyń jańa eki qabatty ǵımaraty paıdalanýǵa berildi.
— Zamanaýı talaptarǵa saı salynǵan eki qabatty Jastar servıstik ortalyǵynyń ashylýy — Memleket basshysynyń jastarǵa arnalǵan qazirgi zamanǵy ınfraqurylym qalyptastyrý jónindegi tapsyrmalaryn iske asyrýdaǵy mańyzdy qadam. Qazirgi tańda Almaty oblysynda 432 myń jas ómir súredi, onyń 82 myńnan astamy Qarasaı aýdanynda turady. Jańa ortalyq jastar úshin shyǵarmashylyq, bilim alý jáne sport alańyna aınalyp, jumysqa ornalasý, turǵyn úı máselesi jáne kásipkerlikti damytý baǵytynda tegin keńester usynatyn bolady, - dedi Almaty oblysy ákiminiń orynbasary Ǵanı Maılybaev.
Aýmaǵy 1 000 sharshy metrdi quraıtyn ǵımarat zamanaýı standarttarǵa tolyq sáıkes keledi jáne birneshe mańyzdy servısti bir keńistikke biriktiredi. Munda Mansap ortalyǵynyń, «Otbasy bankiniń» jáne Jastar densaýlyǵy ortalyǵynyń mamandary jumys isteıdi. Bul jastarǵa qajetti qyzmetterdi uzaq kútýsiz ári ońaı alýǵa múmkindik beredi.
Ortalyqtaǵy basym baǵyttardyń biri — áleýmettik sheberhananyń jumysy. Munda jas qyz-kelinshekter men analar tigin jáne pishý daǵdylaryn tegin meńgere alady. Bul óz kezeginde ózin-ózi jumyspen qamtýǵa, qosymsha tabys tabýǵa jáne áleýmettik beıimdelýge, ásirese osal sanattaǵy jastardy qoldaýǵa jol ashady.
2026 jyly ortalyqta dybys jazý stýdııasy men podkast aımaǵyn jabdyqtaý josparlanyp otyr. Bul kreatıvti ındýstrııanyń damýyna serpin berip, jas talanttardyń zamanaýı medıa quraldarǵa qoljetimdiligin arttyrmaq. Sonymen qatar ortalyq bazasynda oqytý baǵdarlamalary, mádenı is-sharalar, psıhologter, zańgerler jáne memlekettik baǵdarlamalar jónindegi mamandardyń keńesteri uıymdastyrylady.
Almaty oblysynyń jastar saıasaty basqarmasynyń basshysy Mádı Ahmetovtiń aıtýynsha, jastar ınfraqurylymyn jańǵyrtý júıeli túrde júzege asyrylyp keledi.
– Keıingi eki jylda oblys ákimdiginiń qoldaýymen jastarǵa arnalǵan keńistikterdi damytý boıynsha josparly jumys júrgizilip jatyr. Búgin Jastar resýrstyq ortalyǵynyń tórtinshi jańa ǵımaraty ashyldy. Qonaev qalasy men Іle aýdanynda zamanaýı kovorkıng ortalyqtary jumys istep tur. Al 2026 jyly Talǵar, Jambyl, Eńbekshiqazaq jáne Uıǵyr aýdandarynda osyndaı ortalyqtar ashylady. Bul jastar ınfraqurylymyn tolyq jańartyp, olarmen tıimdi jumys júıesin qalyptastyrýǵa múmkindik beredi, - dedi ol.
Jastar ortalyqtary jelisin keńeıtý óńirdi damytý strategııasyndaǵy negizgi baǵyttardyń birine aınalyp otyr. Jańa keńistikter belsendi urpaqty qalyptastyrýǵa, jas kóshbasshylardy qoldaýǵa, áleýmettik jáne shyǵarmashylyq jobalardy júzege asyrýǵa ári jastardy oblystyń damýyna keńinen tartýǵa jol ashady.