Táýelsizdik kezinde tájikterdiń tabıǵı ósimi jylyna orta eseppen 2,4%-dy qurady
ASTANA. KAZINFORM — Táýelsizdik kezeńinde týý kórsetkishiniń ósýi men ólim-jitim deńgeıiniń tómendeýi esebinen halyqtyń tabıǵı ósimi jylyna orta eseppen 2,4%-dy qurady. Bul týraly «Hovar» agenttigi Tájikstan Respýblıkasynyń Densaýlyq saqtaý jáne halyqty áleýmettik qorǵaý mınıstrligine silteme jasap habarlady.
Sonymen birge derekkózdiń málimetinshe, osy kezeńde halyqtyń ortasha ómir súrý uzaqtyǵy 70 jastan 76,3 jasqa deıin artqan.
El úkimeti halyqtyń densaýlyǵyn saqtaýdy odan ári jaqsartý boıynsha sharalar qabyldaǵan. Qazirgi ýaqytta «Tájikstan Respýblıkasy halqynyń densaýlyǵyn saqtaýdyń 2030 jylǵa deıingi kezeńge arnalǵan strategııasy» júzege asyrylyp jatyr.
El halqynyń tabıǵı ósimine qatysty Tájikstan Respýblıkasy prezıdenti janyndaǵy Statıstıka agenttigi 2025 jyldyń birinshi jartyjyldyǵynda Tájikstan halqynyń sany 2,1%-ǵa óskenin habarlady.
Eldegi halyq sany 2025 jylǵy 1 shildedegi jaǵdaı boıynsha týǵandardy, qaıtys bolǵandardy jáne kelgenderdi esepke alǵanda 10 mln 603,8 myń adamdy qurady.
Aldyn ala derekter boıynsha 2025 jylǵy qańtar-maýsymdaǵy halyqtyń tabıǵı ósimi 2024 jylǵy qańtar-maýsymmen salystyrǵanda 2,0%-ǵa ósip, 98,9 myń adamǵa jetti, bul 1000 adamǵa shaqqanda 18,8 adamdy qurady.
2025 jyldyń birinshi jartyjyldyǵynda AHAT organdary zańnamada belgilengen merzimde 116,2 myń jańa týǵan náresteni jáne 17,2 myń ólimdi, onyń ishinde 0,8 myń 1 jasqa deıingi balalardy tirkedi.
Týýdyń jalpy koeffıtsıenti jáne jalpy ólim-jitim koeffıtsıenti aldyn ala málimetter boıynsha 1000 adamǵaa shaqqanda sáıkesinshe 22,1 jáne 3,3 adamdy qurady.
2025 jyldyń birinshi jartyjyldyǵynda 2024 jyldyń birinshi jartyjyldyǵymen salystyrǵanda respýblıkada týylǵandar sany 2,1%-ǵa ósti.
Eske sala keteıik, Tájikstan halqyna «Shahnamanyń» jańa basylymy tegin taratylady.