Táýelsizdik alǵannan beri Arqalyqta alǵash ret jańa mektep ashyldy
ASTANA.KAZINFORM - Premer-mınıstr Oljas Bektenov Qostanaı oblysyna jumys sapary aıasynda Táýelsizdik alǵannan beri alǵash ret salynǵan jańa mektepke bardy. Memleket basshysynyń tapsyrmasymen salynǵan «Jaıly mektep» byltyr jyl sońynda paıdalanýǵa berilgen. Bul týraly Úkimettiń baspasóz qyzmeti habarlady.
Mektep 300 orynǵa arnalǵan. Qostanaı oblysynda bilim berý júıesi damyp keledi. Memleket basshysynyń tapsyrmasy boıynsha oblystyń shalǵaı aýdandarynda ınfraqurylymdyq jobalar, onyń ishinde orta bilim berý mekemeleriniń qurylysy júzege asyrylyp jatyr.
– Arqalyq týraly aıtsaq, búginde munda 25 mektepke deıingi bilim berý uıymy jumys isteıdi. Byltyr 140 oryndyq balabaqsha ashyldy. Orta bilim týraly aıtar bolsaq, Arqalyqta 12 mektep bar, olardyń biri – Jaıly mektep. Byltyr qarashada paıdalanýǵa berildi. Mektep halyqaralyq standarttarǵa saı. Aıta keteıik, bizdiń barlyq 6 jaıly mektebimizde bilim qazaq tilinde beriledi, — dedi Qostanaı oblysy ákimdigi bilim basqarmasynyń basshysy Aıman Ibraeva.
№7 orta mektep dırektory Aqtoty Kısıkova nysannyń iske qosylýy oqý jaǵdaıyn jaqsatyp qana qoımaı, qaladaǵy mektepterde oryn jetispeýshiligi máselesin sheshýge múmkindik bergenin atap ótti.
Qazir mektepte 316 oqýshy oqıdy, onyń ishinde 42-si 1-synyp oqýshysy. Synyptardyń ortasha tolymdylyǵy 17–18 oqýshydan. Barlyǵy 19 synyp. Oqý protsesi eki aýysymda uıymdastyrylǵan. Mektep jıhaz jáne qural-jabdyqtarmen 100% qamtamasyz etilgen.
— Mektepte robototehnıka kabınetteri, tsıfrlyq zerthanalar men praktıkalyq sabaqtarǵa arnalǵan sheberhanalar jabdyqtalǵan. Tipti bastaýysh synyptarǵa da zamanaýı quraldar men jabdyqtalǵan synyptan tys aımaqtar qarastyrylǵan, - dedi ol.
Ujymda 38 pedagog qyzmet etedi. Muǵalimderdiń jartysynan astamy biliktilik sanattaryna ıe. Olardyń qatarynda pedagog-sheberler, moderatorlar, sarapshylar jáne zertteýshiler bar.
Oljas Bektenov Qostanaı oblysyndaǵy bilim berý nysandaryna barǵanyn jazǵan bolatynbyz.