Táýelsizdigimizdiń 35 jyldyǵyn naqty nátıjelermen qarsy alý kerek – Prezıdent
ASTANA. KAZINFORM – Memleket basshysy Qasym-Jomart Toqaev Astanada Memlekettik rámizder kúnine arnalǵan saltanatty sharada el ishinde jasalyp jatqan reformalar nátıjesi jóninde pikir bildirdi.
– Qurmetti otandastar! Biz bıyl Táýelsizdiktiń 35 jyldyǵyn atap ótemiz. Bul tarıhı kezeń júrip ótken jolymyzdy jan-jaqty tereń taldaýdy jáne bolashaqqa strategııalyq jospar qurýdy muqııat oılastyrý turǵysynan úlken mánge ıe, – dedi Prezıdent.
Qasym-Jomart Toqaev mereıli datany qajyrly eńbekpen jáne naqty nátıjelermen qarsy alý qajet ekenin basa aıtty.
– Bıyl tutas elimiz úshin aýqymdy ózgeristerge toly jyl bolyp otyr. Qazaqstan qoǵamdyq ómirdiń barlyq salasynda sony serpiliske umtylǵan el retinde ornyqty damýdyń dańǵyl jolyna tústi, – dedi Memleket basshysy.
Aıta keteıik, 4 maýsymda elimizde Memlekettik rámizder kúni atap ótiledi. Osydan 34 jyl buryn táýelsiz Qazaqstannyń óz Eltańbasy, Týy jáne Ánurany bekitildi.
Prezıdent bul kún – qazaq eliniń árbir azamaty úshin mańyzy erekshe mereke ekenin aıtty.
