«Táýelsizder»: Astanada esirtkige qarsy kúres týraly drama usynyldy
ASTANA. KAZINFORM – M. Gorkıı atyndaǵy Memlekettik akademııalyq orys drama teatrynda nashaqorlyqtyń aldyn alýǵa jáne esirtki qylmysyna qarsy is-qımylǵa arnalǵan «Táýelsizder» derekti dramasynyń premerasy ótti, dep habarlaıdy Astana ákimdiginiń resmı saıty.
Qoıylym elordada esirtki qylmysyna qarsy is-qımyl jónindegi keshendi jospardy jáne nashaqorlyqtyń aldyn alý jónindegi «Astana - esirtkisiz qala» aktsııasyn iske asyrý sheńberinde usynyldy.
Premeraǵa elorda ákiminiń orynbasarlary Eset Baıken men Erik Meıirhanov, Parlament Májilisiniń depýtattary, qalalyq basqarmalardyń ókilderi, qoǵam qaıratkerleri qatysty.
«Esirtkini qoldanýdyń qaıǵyly saldaryn jastarǵa jetkizý úshin esirtki bıznesine qarsy nasıhattyń kez kelgen túrin qoldaný qajet. Bul jaǵdaıda - teatr. Ol adamdardy tartýdyń ortalyǵy bolyp sanalady jáne meniń oıymsha, jastar taǵylymdy spektakldi tamashalaıdy», - dep atap ótti QR Parlamenti Májilisiniń depýtaty Elnur Beısenbaev.
Derekti drama belgili bir sebeptermen táýeldilikke ushyraǵan adamdar týraly boldy. Kórermen ózin-ózi qurdymǵa jibergen qynjyltatyn alty oqıǵany kórdi.
«Stsenarıı jazý kezinde men kóptegen emotsııany bastan ótkerdim. Bul aýyrsyný, ashýlaný jáne úmitsizdik. Sátter tolyq kúıreý boldy. Esirtkige tap bolǵan jáne ómirin qurtqan adamdardyń alty shynaıy oqıǵasy kórermenge esirtkiniń zulymdyq ekenin anyq kórsetýi kerek», - dep atap ótti derekti dramanyń rejısseri Oleg Fedorenko.
Drama naqty oqıǵalarǵa negizdelgen. Jas rejısser shyǵarmashylyq obektıvi arqyly óz ómiri týraly oılanýǵa májbúr etetin jáne rýhanı qundylyqtar men moraldyń ótkir máselelerin kóteretin oqıǵalardy jetkizdi.
«Táýelsizder» derekti dramasy – bul jaı ǵana spektakl emes, jas urpaqty zııandy táýeldilikten qorǵaýǵa jáne qoǵamdaǵy rýhanı qundylyqtardy nyǵaıtýǵa baǵyttalǵan áleýmettik joba.