Táýelsiz ekolog Kaspııdegi munaı kompanııalaryn jappaı tekserýdi usyndy
AQTAÝ. KAZINFORM — Aqtaýlyq táýelsiz ekolog, «ECOJER» qaýymdastyǵy aımaqtyq ekologııalyq keńesiniń tóraǵasy Ádilbek Qozybaq Kaspııde balyqtardyń qyrylýyna qatysty pikir bildirdi.
Onyń aıtýynsha, balyqtardyń ólýi — ekologııalyq apatty kórsetedi. Biraq, jaǵalaýdan alynǵan synamalar durys nátıje bermeýi múmkin.
— Balyqtardyń bulaı qyrylýy — teńizde bir lastanýdyń bar ekenin kórsetedi. Teńizdiń qaı jerinde lastaný bolǵanyn anyqtaý úshin dál sol jerde teksermese, basqa jerden tekserý árıne durys nátıje bermeıdi. Sondyqtan bul jerde teńizde jumys jasap jatqan barlyq kompanııalarǵa qatań túrde baqylaý jumystary júrgizilýi kerek jáne ol baqylaý jumystaryna mindetti túrde táýelsiz sarapshylar qatystyrylýy kerek. Sonda ǵana ekologııalyq apattardyń aldyn-alamyz, — deıdi táýelsiz ekolog.
Eske salaıyq, ótken aptada Túpqaraǵan aýdanyndaǵy Baýtın jáne Atash eldi mekenindegi teńiz jaǵalaýynan qyrylǵan balyqtar tabyldy. Olardyń arasynda taban, qarakóz, shabaq jáne kefal bar.
«Qazaq balyk» Respýblıkalyq balyq sharýashylyǵy jáne akvamádenıet qaýymdastyǵynyń Mańǵystaý oblysy boıynsha fılıalynyń dırektory Danııar Ákimjanovtyń aıtýynsha, usaq balyqtardyń qyryla bastaǵanyna 2-3 jyl bolǵan. Sonymen qatar, sýda mekendeıtin qustar da ólip jatyr.
— Qyrylyp qalǵan qarakóz balyqtardyń kishkentaılary. Olar kúzge deıin ósip, úlkeıýi kerek edi. Sol kezde qarakózdi aýlaý maýsymy bastalady. Sýdań, topyraqtyń synama aldy dep jatady ǵoı biraq, ol jetkiliksiz. Sebebin anyqtaý úshin naqty qadamdar jasaý kerek. Táýelsiz ekologtardy shaqyryp, táýelsiz synamalyq taldaý ortalyqtaryna jiberip, júıeli jumystar júrgizilýi tıis. Eldi mekenderdiń jaǵajaılaryn ǵana tekserip qoımaı, araldar bar, soltústik, ońtústik kaspıı bar bárin tekserý kerek, — deıdi Danııar Ákimjanov.
Buǵan deıin, Mańǵystaýda teńiz jaǵalaýynan ólgen balyqtar tabylǵany týraly jazǵan bolatynbyz.