Táýelsiz dırektor endi úshten artyq kompanııada qyzmet atqara almaıdy
ASTANA.KAZINFORM - QR Ulttyq ekonomıka mınıstrligi áleýmettik-kásipkerlik korporatsııalardyń (ÁKK) táýelsiz dırektorlaryna bir mezgilde birneshe uıymda qatar jumys isteý múmkindigin shektedi, dep habarlaıdy Joǵary aýdıtorlyq palatanyń baspasóz qyzmeti.
Bul shara Joǵary aýdıtorlyq palatanyń nusqamasy boıynsha qabyldandy jáne ÁKK-lerdi basqarý sapasyn arttyrýǵa baǵyttalǵan.
2025 jyly Joǵary aýdıtorlyq palata ÁKK-lerdiń tıimdiligine jáne olardyń óńirlerdiń damýyna yqpalyna aýdıt júrgizdi. Tekserý barysynda keıbir ÁKK-lerdegi táýelsiz dırektorlardyń bir ýaqytta respýblıka boıynsha ártúrli óńirlerde ornalasqan bes jáne odan da kóp uıymnyń basqarý organdarynyń quramyna kiretini anyqtaldy.
-Aýdıtorlar mundaı júkteme jaǵdaıynda táýelsiz dırektorlardyń ÁKK sheńberinde obektıvti ári derbes sheshim qabyldaı almaıtyny týraly qorytyndyǵa keldi. Qashyqtan jumys istegendikten, olar óńirdiń ereksheligi men korporatsııanyń ishki úderisterin tolyq bilmeıdi. Іs júzinde olardyń dırektorlar keńesiniń jumysyna qatysýy daýys berýge formaldy qatysýmen shekteledi,-delingen habarlamada.
Osyǵan baılanysty Joǵary aýdıtorlyq palata QR Ulttyq ekonomıka mınıstrligine normatıvtik quqyqtyq aktilerge ózgerister engizip, táýelsiz dırektorlardyń kvazımemlekettik sektor sýbektileriniń jumysyna qatysýyn shekteýdi tapsyrdy.
Nátıjesinde qajetti túzetýler Korporatıvtik basqarýdyń úlgilik kodeksine engizildi. Sondyqtan jańa talap tek ÁKK-lerge ǵana emes, «Samuryq-Qazyna» Ulttyq ál-aýqat qorynan basqa memleket qatysatyn barlyq aktsıonerlik qoǵamǵa qatysty bolady. Endi dırektorlar keńesiniń múshesi bul laýazymdy úshten artyq zańdy tulǵada, al dırektorlar keńesiniń tóraǵasy ekiden artyq zańdy tulǵada atqara almaıdy.
Bul shara táýelsiz dırektorlar ınstıtýtyn nyǵaıtyp, onyń naqty strategııalyq sheshimder qabyldaýǵa qatysý arqyly bastapqy mánin qalpyna keltirýge jáne áleýmettik-kásipkerlik korporatsııalardaǵy basqarý sapasyn arttyrýǵa tıis.
Memlekettik aýdıt qorytyndysy boıynsha berilgen qalǵan tapsyrmalardyń oryndalýy Joǵary aýdıtorlyq palatanyń baqylaýynda bolady.
Osyǵan deıin Prezıdent Álıhan Smaıylovqa memlekettik aýdıt júıesin jetildirýge qatysty tapsyrma bergen bolatyn.
