Táýelsizdiktiń jarqyn jylnamasyn jazýǵa atsalysqan jandardyń ishinen men Á. Kekilbaıuly esimin ár kez rıza kóńil, rııasyz sezimmen aıtyp júremin - N. Nazarbaev
ASTANA. Jeltoqsannyń 5-i. QazAqparat /Qanat Mámetqazyuly/ - Táýelsizdiktiń jarqyn jylnamasyn jazýǵa atsalysqan jandardyń ishinen men Á. Kekilbaıuly esimin ár kez rıza kóńil, rııasyz sezimmen aıtyp júremin. Búgin zamanymyzdyń zańǵar tulǵasy, belgili jazýshy, qoǵam qaıratkeri, QR Parlamenti Senatynyń depýtaty Ábish Kekilbaevtyń 70-jyldyq mereıtoıyna arnalǵan shyǵarmashylyq keshinde sóz sóılegen QR Prezıdenti Nursultan Nazarbaev osylaı dedi,
dep habarlaıdy QazAqparat.
«Búgin elimizdiń mádenı-rýhanı ómirindegi jarqyn da jarasymdy, abzal da ardaqty merekeli kúnniń biri. Kórnekti memleket jáne qoǵam qaıratkeri, sóz óneriniń sardary, qazaq ádebıetiniń sańlaǵy Ábish Kekilbaıuly 70 jasqa tolyp otyr. Maǵynaly ǵumyrynyń mazmundy shaqtaryn, ónegeli ómirbaıanynyń ómirsheń shekterin tabıǵı talantymen órnektegen, eńbek joldaryn halqynyń ǵumyrnamasymen órnektep bergen aıtýly daryn - Ábish Kekilbaıuly, osyndaı tamasha da taǵylymdy kúnin bizben, búgingi zamandastarymen birge qarsy alyp otyr. Jemisti jyldar men jeńisti jyldardy qamtyǵan jaısań jasyńyz qutty bolsyn!», dedi N. Nazarbaev.
Sonymen birge, óziniń quttyqtaý sóziniń barysynda Elbasy Á. Kekilbaıulynyń shyǵarmashylyq tabystaryna, sol saladaǵy baǵyndyrǵan shyńdaryna, qyrýar eńbekterine toqtala otyryp, jazýshynyń qaıratkerlik beınesi týraly oıyn da ortaǵa saldy. «Ata-babamyz armandap ótken uly kúnge - azattyq pen erkindikke qol jetkizgen tarıhı kezeńde tize qosyp, táýelsiz kúnderdiń jarqyn jylnamasyn jazýǵa atsalysqan jandardyń ishinen men Á. Kekilbaıuly esimin ár kez rıza kóńil, rııasyz sezimmen aıtyp júremin», dedi Elbasy.
