Táýelsizdiktiń tiregi ulttyq sana, al ulttyq sana tarıh pen mádenıet arqyly qalyptasady - Elbasy
ANA. 25 mamyr. QazAqparat /Marlan Jıembaı/ - Táýelsizdiktiń tiregi ulttyq sana, al ulttyq sana tarıh pen mádenıet arqyly qalyptasady.
Búgin Astanada ótken Dúnıejúzi qazaqtarynyń IV Quryltaıynda QR Prezıdenti - Dúnıejúzi qazaqtary qaýymdastyǵy Tóralqasynyń tóraǵasy Nursultan Nazarbaev osylaı málimdedi.
«Táýelsizdiktiń tiregi ulttyq sana ekenin bilesizder. Al ulttyq sana tarıh pen mádenıet arqyly qalyptasady. Osyǵan oraı elimizdegi «Mádenı mura» memlekettik baǵdarlamasy jemisti júzege asyrylýda. Memleket tarapynan ulan-ǵaıyr qarjy bólingen», - dedi N.Nazarbaev.
Memleket basshysynyń aıtýynsha, baǵdarlama boıynsha barymyzdy baǵalap, joǵymyzdy túgendeýde ulan-ǵaıyr is atqaryldy. Sonyń arqasynda 100-ge tarta tarıhı-mádenı nysan jańǵyrtylyp, onyń 73-iniń qalpyna keltirý jumystary aıaqtaldy. Shetelderden tarıh pen mádenıetimizge qatysty 5 myńnan astam qundy derekter taýyp alynyp, kóshirmeleri elimizge ákelindi. Álemdik aqyl-oıdyń eń ozyq úlgileri qazaq tline aýdarylyp, odan tom-tom kitap bolyp jaryq kórýde.
«Bul qundylyqtar keleshekte jastardyń oıyna ulttyq sana sińirýge jol ashady. Ulttyq folklorymyz «Babalar sózi» degen atpen 100 tomǵa jınaqtalyp, jaryq kórýde. Sondaı-aq ár qıyrdy shashylyp jatqan ulttyq mýzykalyq muramyz da jınaqtaldy. Olarǵa shet el qazaqtarynyń ánderi men kúıleriniń de engizilgenin atap ótkim keledi», - dedi Elbasy.
