«Táýelsizdiktiń nyshany - «Máńgilik el» qaqpasy» - respýblıkalyq basylymdarǵa sholý
***
«Egemen Qazaqstan» gazetiniń jazýynsha, Astanada el Táýelsizdiginiń 20 jyldyǵy qarsańynda «Halyq Qaharmany», armııa generaly Saǵadat Nurmaǵambetov atyndaǵy «Jas ulan» respýblıkalyq mektebiniń jańa kesheni ashyldy. Onyń ashylý saltanatyna Elbasy - Qarýly Kúshterdiń Joǵarǵy Bas qolbasshysy Nursultan Nazarbaev qatysty. Memleket basshysy mektep tárbıelenýshilerin jańa keshenniń ashylýymen quttyqtaǵan soń, Qorǵanys mınıstri Ádilbek Jaqsybekov mekteptiń oqý-materıaldyq bazasymen tanystyrdy. Qarýly Kúshterdiń Joǵarǵy Bas qolbasshysy 51 synyby bar 4 qabatty oqý ǵımaratynyń aýdıtorııalaryn, 500 oryndyq jataqhanasyn, kitaphana men oqý jáne májilis zaldaryn aralap kórdi. «Prezıdent Nursultan Nazarbaev ekinshi kezekte Astanadaǵy Baýyrjan Momyshuly kóshesinde ornalasqan jańa nysan - Oqýshylardyń shyǵarmashylyq saraıyna kelip, keshenniń jańa zaldary men bólmelerin aralap kórdi. Jalpy aýmaǵy 60 myń sharshy metrdi alyp jatqan Oqýshylar saraıy - 4 qabattan turatyn, kópbeıindi, syrt pishimi kúrdeli ǵımarat», dep jazady basylym. Maqala «Jas ulandarǵa - jańa nysandar» degen taqyryppen berilgen.
«El Táýelsizdiginiń 20 jyldyǵy qarsańynda qýattylyǵy 1500 kVt. Qordaı jel elektr beketiniń birinshi kezegi iske qosylyp, paıdalanýǵa berildi», - dep jazady «Egemen Qazaqstan» gazeti. Basylymnyń atap ótýinshe, Qordaı jel elektr beketi elimizdegi jel qýatynyń alǵashqy jobalarynyń biri jáne jeldi paıdalaný arqyly elektr qýatyn óndiretin birinshi ónerkásiptik nysan bolyp tabylady. Qordaı JES-niń birinshi kezeginiń qurylysyna «Izen-Sý» kompanııasy 370 mln. teńge ınvestıtsııa saldy. JES qurylysy jobasyn iske asyrýǵa 40 jumysshy tartyldy. Al 500-den astam otbasy men olardyń jeke sharýashylyqtarynyń elektr qýatyna degen qajetin óteıtin bekette nebary 9 adam jumys isteıtin bolady.
***
«Qyzlorda oblysynyń ákimi Bolatbek Qýandyqov myrza osydan biraz ýaqyt buryn dańqty otandasymyz, ataqty aýyr atlet Ilıa Ilınge 2 mıllıon 250 teńge kóleminde stıpendııa taǵaıyndaý jóninde usynys aıtqan bolatyn. Bul shamamen 15 myń AQSh dollaryn quraıdy. Ákimniń bastamasyn qoldaǵan oblystyq máslıhat osy máselege baılanysty sheshim shyǵardy», - dep jazady «Aıqyn» gazeti búgingi sanyndaǵy «Ilıa Iınge 15 000 dollar stıpendııa taǵaıyndaldy» degen taqyryptaǵy maqalasynda. Basylymnyń atap ótýinshe, osylaısha áıgili sportshynyń materıaldyq jaǵdaıy jaqsarmaq.
***
Qazaqstan Respýblıkasynyń Tuńǵysh Prezıdenti - Elbasymyz Nursultan Ábishuly Nazarbaevtyń bıylǵy elimizdiń árbir azamaty úshin qashanda qarymynan qýat, qoǵamynan saýat esken memlekettiliktiń aıshyqty belgisi bolǵan Qazaqstan Táýelsizdiginiń aıtýly 20 jyldyǵy qarsańynda elordada sáýlet týyndysyn turǵyzý ıdeıasynyń nátıjesinde Astanada asqaq rýhymyzdyń taǵy bir sımvoly - «Máńgilik el» saltanat qaqpasy boı kótermek. Osy oraıda «Alash aınasy» gazeti qalyń oqyrmanǵa osy bir erekshe qurylystyń jan-jaqty sıpattamasyn usynyp otyr. Biregeı sáýlet óneri jaıynda egjeı-tegjeıli bilgińiz kelse, «Táýelsizdiktiń nyshany - «Máńgilik el» qaqpasy» degen taqyrypqa zer salyńyz.
«Alash aınasy» gazeti men Qazaq radıosynyń birlesken jobasy aıasynda halyq jazýshysy Sherhan Murtazamen arada órbigen suhbat basylymnyń búgingi nómirinde jarııalanyp otyr. «Menimen birge týǵan urpaq qyrylyp qalmaǵanda, búgin 30-40 mıllıonǵa jeter me edik...» degen taqyryppen berilgen suhbat barysynda tilshiniń barlyq saýaldaryna tuşymdy jaýap bergen qalamger: «Janym tynyshtyq qalaıdy. Aman-esen saý-salamat jaryq dúnıede júre bersem deımin. Meniń bul tilegimdi Alla qashanǵy bere beredi, qashanǵy meniń sózime qulaq salady? Onyń barlyǵy ýaqytsha dúnıe ǵoı. Bir kúni alyp soǵady. Ony bilemiz, kózimiz jetedi. Ólmeıtin pende joq», - deıdi.
***
«Kazahstanskaıa pravda» gazetiniń jazýynsha, QR Prezıdenti Nursultan Nazarbaevtyń bastamasyn qoldaı otyryp, «Nur Otan» partııasy saılaý naýqanyna qatysatyn barlyq saıası partııalarǵa 2012 jylǵy 15 qańtarda Qazaqstan Respýblıkasy Parlamenti Májilisi men máslıhattar depýtattarynyń ádil de ashyq saılaýyn ótkizý týraly memorandýmǵa qol qoıý usynysyn jasap otyr. «Aldaǵy joǵary jáne jergilikti ókildi organdarǵa saılaý qazaqstandyq demokratııa damýynyń jańa máresine aınalaryna, azamattyq bastamany arttyrýǵa yqpal eterine, memlekettik saıasatty júrgizýge azamattardyń qatysý deńgeıin keńeıterine biz senimdimiz», - deıdi nurotandyqtar.
