Táýelsizdiktiń bultartpas aqıqaty
1991 jyldyń 16 jeltoqsanynda Qazaqstannyń Tuńǵysh Prezıdenti Nursultan Nazarbaev «Qazaqstan Respýblıkasynyń Memlekettik táýelsizdigi týraly» Konstıtýtsııalyq zańǵa qol qoıdy. Osylaısha, álem kartasynda Qazaqstan Respýblıkasy paıda boldy.
Qazaq táýelsizdikti qalaı qarsy aldy? «Bul kúni ýaqyt ólshemine baǵyna qoımaıtyn maqtanysh, qýanysh pen tolqynys ózara úılesim taýyp, erekshe sezimge bólendik», - dep eske alady eski kúndi Elbasy Nursultan Nazarbaev. Iá, Qazaqstannyń Táýelsizdigi – Arqada astana turǵyzǵan eldiń ǵana emes, búkil álemdegi qarǵa tamyr qazaqtyń baqyty edi. Din qaıratkeri Halıfa Altaı Ystanbul kóshesinde kele jatqanda radıodan «Búgin Qazaq eli táýelsizdik aldy!» dep túrik tilinde sańqyldap jatqan daýysty estip, turǵan jerinde qubylany taýyp alyp, Jaratqan Ieden «Qazaq degen halyqty ǵumyrly qyla gór!» dep duǵa tilepti. Al Ábish Kekilbaev óz esteliginde «el taǵdyry sheshiler saǵatta azamattarymyz bir úıdiń balasyndaı yntymaqty minez tanytqanyn» jazsa, halyq jazýshysy Qabdesh Jumadilov «sol kúni jańalyqty estip, teledıdardyń aldynda egilip jylaǵanyn» eske alady.
«Azat bolýdan, eshkimge basybaıly qul bolmaýdan artyq baqyt bar ma?», - deıdi amerıkalyq aqyn Ýolt Ýıtmen.
Qudaıǵa shúkir, qazaq quldyqtyń qamytynan bosap, derbes memleket bolyp otyr. Dese de, zamanymyzdyń belgili aqyny Qalqaman Sarınniń egemendik jaıly: «Saǵan jetý qıyn bolsa qanshalyq, saqtap turý qıynyraq odan da», - degeni de árbirimizdi oısyz qaldyrmaýy tıis. Áıtpegende, «óz qolyńnan ketken soń endi óz yrqyń» dep túńile jyrlaǵan Abaı azattyqty ańsamady deısiz be? Urpaǵym kórkeýde bolmasyn dep, ult qaıratkerleri «ózine artylǵan júkti jeter jerine aparyp tastady». Olardyń árbirine qaryzdar búgingi urpaq. Endigi mindet – osy Táýelsizdikti baıandy etý. Endeshe, Álıhan Bókeıhannyń myna sózin esimizden shyǵarmaýymyz kerek: «Bostandyqqa aparatyn jalǵyz jol – ulttyq yntymaq qana!»
Bıyl Táýelsizdiktiń 28-shi jeltoqsanyn qarsy alyp otyrmyz. Bir kezde sory qaınap, sorpasy tógilgen, toqymy keppeı, toz-tozy shyqqan jurt bul kúnde tutas memleketke aınaldy. Mán bersek, Memleket basshysy Qasym-Jomart Toqaevtyń Jastar jylynyń aıaqtalyp, Volonter jylynyń bastalýyna oraı ótkizilgen jıyndaǵy sózinde zor maǵyna bar.
«Bultartpaıtyn bir aqıqatty esten shyǵarmaǵan jón: eldiń Táýelsizdigi men onyń aýmaqtyq tutastylyǵyn halyqaralyq uıymdardyń daýystary arqyly ǵana emes, oıly ishki jáne syrtqy saıasatpen ǵana qorǵap qalýǵa bolady. Halyq óz táýelsizdigin myǵym ári birligi bekem memleket turǵysynda saqtap qala alady. Sondyqtan, oılardyń san salaly bolýyna qaramastan, bastysy – Qazaqstannyń Táýelsizdigin ustap turǵan negizdi álsiretip almaý kerek!»
Prezıdenttiń dál osy sózdi jastar aldynda aıtýynyń mańyzy zor. Halyqaralyq saıasattan habary mol basshynyń bul sózdi tekke aıtpaǵany haq. Ras, bultartpaıtyn da bura tartýǵa kelmeıtin osy shyndyqty esten shyǵarmaǵan abzal. Endeshe, «Alash týy astynda, kún sóngenshe sónbeýge» sert bergen rýhty jastarymyz kóbeıe bersin!
Táýelsizdigimiz baıandy bolsyn!
