Táýelsizdiktiń alǵashqy jyldaryndaǵy ishki ister mınıstri «Qurmet» ordenimen marapattaldy
Sharaǵa Іshki ister mınıstri Qalmuhanbet Qasymov, mınıstrliktiń basshylyq quramy, ishki ister organdary qyzmetkerleri men ardagerleri, sonymen birge Qazaqstan polıtsııasynyń qalyptasýy jyldarynda ІІM-niń birinshi basshysy jáne olardyń orynbasarlary qyzmetin atqarǵan tulǵalar qatysty.
Mınıstr óz sózinde Elbasymyzdyń kóregen saıasaty arqasynda Qazaqstan álemdik qaýymdastyqtyń tolyqqandy múshesine retinde qalyptasyp, ekonomıkasy damyǵan básekege qabiletti elge aınalǵanyn atap ótti. Odan ári turaqty damý úshin elimizde senimdi quqyqtyq tártip pen qaýipsizdikti, turaqtylyqty nyǵaıtý jáne azamattardyń konstıtýtsııalyq quqyǵyn tıimdi qorǵaýdy qamtamasyz etý qanshalyqty mańyzdy ekenine toqtaldy. Osy rette ishki ister organdaryna artylar mindet zor. Táýelsizdik alǵan jyldardan bastap ІІM-niń júıesi jan-jaqty damyp, jetilý ústinde boldy. Polıtsııa qyzmetkerleri talaı qıyn synaqtardy bastan ótkerip, shyńdaldy. Sonyń nátıjesinde ishki ister organdary elimizdegi memlekettik bıliktiń senimdi tiregine aınaldy.
Búginde qazaqstandyq polıtsııa tarıhynda talaı batyrlyq pen erlikke toly oqıǵalar boldy. Sonyń aıqyn bir dáleli - Táýelsizdiktiń alǵashqy jyldarynan kúni-búginge deıin ishki ister organdary men Ulttyq ulannyń 1246 qyzmetkeri memlekettik nagradaǵa ıe boldy. Onyń 108-ine bul marapat qaza tapqannan keıin berildi. Polıtsııa kapıtany Ǵazız Baıtasovqa qaza tapqannan keıin «Halyq qaharmany» ataǵy berilse, polkovnık Qaırat Úmbetov bul ataqqa erlikpen qol jetkizip, keıingilerge shynaıy patrıotızmniń úlgisin kórsetip keledi. Ókinishke qaraı, táýelsizdik jyldarynda 946 polıtseı qyzmettik boryshyn óteý kezinde qaza tapty, 2353 qyzmetker jaralandy.
Saltanatty is-sharada Qalmuhanbet Qasymov Táýelsizdiktiń alǵashqy jyldarynda ishki ister mınıstrligin basqarǵan Qaıyrbek Súleımenov, Bolat Ysqaqov jáne burynǵy mınıstrdiń orynbasarlary Vasılıı Sımachev, Ivan Otto, Nıkolaı Vlasov, Qojamurat Óskembaevty arnaıy marapattap, jas memlekettiń irgesin nyǵaıtýǵa qosqan ólsheýsiz úlesteri úshin alǵys bildirdi. Olardyń barlyǵy da Elbasynyń Jarlyǵy boıynsha «Qurmet» ordenimen, ІІO-nyń ardageri Kemel Jumashev «Parasat» ordenimen nagradtaldy.
Sondaı-aq, áskerı jáne qyzmettik mindetterin adal oryndap júrgen, zańdylyq pen quqyqtyq tártipti qorǵaýdaǵy erligi men qaısarlyǵy úshin ishki ister organdarynyń qyzmetkerleri, Ulttyq ulannyń áskerı qyzmetshileri men ardagerleri marapattaldy. Olarǵa Elbasynyń arnaıy Jarlyǵymen ІІ dárejeli «Aıbyn» ordeni, І dárejeli «Dańq» ordeni jáne «Erligi úshin» medaldary tabys etildi.
Vedomstvolyq nagradalar jáne gramotalarǵa ishki ister organdarynyń 828 qyzmetkeri ıe boldy.
Іs-sharanyń sońy ІІM Mádenıet ortalyǵy ánshileri men Ulttyq ulannyń án-bı ansambli daıyndaǵan merekelik kontsertke ulasty.
