Táýelsizdiktiń 30 jylyndaǵy Shyǵys Qazaqstannyń jetistikteri qandaı
ShQO aqparat ortalyǵynyń málimetinshe, Táýelsizdiktiń 30 jylynda óńirde 144 mektep, 27 balabaqsha, 453 sport nysany, 100 myńnan astam páter jáne 107 densaýlyq saqtaý mekemesi salyndy.
Sońǵy úsh jylda Óskemende robotohırýrgııa, polıtravma, ortopedııa, oftalmohırýrgııa, pýlmonologııa ortalyqtary men oblystyq balalar aýrýhanasy ashylǵan.
«Semeıde gıbrıdti operatsııalyq, Oftalmohırýrgııa ortalyǵy, ıAdrolyq medıtsına ortalyǵy iske qosyldy. Aıagóz jáne Altaı qalalarynda ınsýlt ortalyqtary, geografııalyq erekshelikterdi eskere otyryp, patsıentterdi ýaqtyly kómekpen qamtýdy qamtamasyz etýge múmkindik beretin teri arqyly koronarlyq aralasý ortalyqtary quryldy. Sońǵy tórt jyldan astam ýaqyt boıy dárigerlerdi jetekshi sheteldik klınıkalarda oqytý baǵdarlamasy júzege asyrylýda. Osy ýaqyt ishinde 5,5 myńnan astam maman óz biliktiligin arttyrdy», - delingen málimette.
Agroónerkásiptik keshen salasynda aýyl sharýashylyǵynyń jalpy ónim kólemi 1991 jylǵy 7 mln teńgeden 2020 jyldyń qorytyndysy boıynsha 686 mlrd teńgege deıin ósti.
Aýyl sharýashylyǵyna ınvestıtsııalar 75 esege artyp, 36 mlrd teńgege jetti.
«2010 jyldan bastap Shyǵys Qazaqstanda Indýstrııalandyrý kartasy aıasynda 9 myń jańa jumys ornyn qurýmen 769 mlrd teńge somasyna 55 joba iske asyryldy. Óńir ınnovatsııalyq ónim kólemi boıynsha respýblıkada besinshi orynda tur. Qazaqstan Respýblıkasynyń barlyq ınnovatsııalyq ónimderiniń 7 paıyzǵa jýyǵy Shyǵys Qazaqstanda óndiriledi. Jumys istep turǵan shaǵyn jáne orta bıznes kásiporyndarynyń sany eki esege artty. 2005 jyly olardyń sany shamamen 46 myńdy qurady. Búginde bul kórsetkish 90 myńnan asyp otyr», - delingen aqparatta.
