Táýelsizdiktiń 30 jyly ishinde 1 mıllıon qandas atamekenge oraldy – Sanaı Zańǵar

NUR-SULTAN. QazAqparat – Táýelsizdigimizdiń 30 jyly ishinde 1 mıllıon qandasymyz atamekenine oraldy. Bul týraly Qazaqstan halqy Assambleıasynyń HІH sessııasynda Astana» telearnasynyń Qostanaı oblysyndaǵy tilshisi Sanaı Zańǵar aıtty, dep habarlaıdy QazAqparat tilshisi.

«Azattyqtyń arqasynda Altaıdan – Atyraýǵa deıingi baıtaq dalanyń shekarasy belgilenip, qazyǵy qaǵyldy. San ǵasyrdyń túıtkili bolǵan Qytaı men Qazaqstan, Reseı, Ózbekstan, Qyrǵyzstan, Túrkimenstan syndy memleketter arasyndaǵy shekara máselesi sheshilgende, álemdik qaýymdastyq tańdanysyn jasyra almady. Rasynda, keıbir memleketter ǵasyrlar boıy shekara máselesin sheshe almaı keledi. Al Siz, saıyn dalanyń shetki shebin sanaýly ýaqytta shegendep berdińiz. Eren eńbegińizge kemeldi keleshek urpaq óziniń tarıhı baǵasyn beredi dep bilem», - dedi ol Elbasyna qarata.

Sonymen qatar ol QR Tuńǵysh Prezıdenti negizin qalaǵan «Nurly kósh» baǵdarlamasymen eldiktiń eleýli 30 jylynda bir mıllıonnan astam adam atamekenine oralǵanan aıtty.

«Álbette ár qandas «Elim maǵan ne beredi dep emes, men elime ne berem degen» kemel oımen keldi. Onyń dáleli Tobyl óńirine turaqtaǵan bizdiń áýlet. Ata-anammen baýyrlarym ata kásippen aınalysyp, jaǵdaıyn jaqsartyp, tirshiligin túzep otyr», - dedi ol.

Sonymen qatar ol atamekenge at basyn tiregen aǵaıyn eldiń áleýmettik-ekonomıkalyq áleýetin arttyrý jolynda aıanbaı eńbek etip jatqanyn, órkenıet kóshine ilesken óreli eldiń turmys-tirshiligine beıimdelip, túrli ulys ókilderimen til tabysyp, bite qaınasqanyn atap ótti.

«Sońǵy jyldary qandas talapkerlerge bólinetin kvota eselep ulǵaıdy. Sonyń arqasynda 7 myńnan astam qandas baýyr qazir elimizde bilim alyp júr. Tipti AQSh, Kanadada turatyn qazaq jastary áıgili Garvard, Kembrıdj emes, Ortalyq Azııadaǵy ozyq oqý oryny — Nazarbaev ýnıversıtetine túsip jatyr», - dedi ol.