Táýelsizdiktiń 30 jyly: Aqmola oblysynyń mádenıet salasy qalaı damyp keledi
«Sálem, Elorda!» ІІ respýblıkalyq óner sherýi aıasynda uıymdastyrylǵan kezdesýge QR Mádenıet jáne sport vıtse-mınıstri Nurǵısa Dáýeshov, Roza Baǵlanova atyndaǵy «Qazaqkontsert» memlekettik kontserttik uıymynyń dırektory Jeńis Seıdýllauly, Aqmola oblysy ákiminiń orynbasary Aına Mysyrálimova, oblystar men respýblıkalyq mańyzy bar qalalar fılarmonııalary men kontserttik uıymdarynyń, Halyq shyǵarmashylyǵyn damytý ortalyqtarynyń dırektorlary, óner sherýi aıasynda ótkizilgen sheberlik saǵattaryna shaqyrylǵan mamandar qatysty.
Sonymen birge, kezdesý barysynda Memleket basshysy Qasym-Jomart Toqaevtyń 2021 jylǵy 1 qyrkúıektegi «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýyn nasıhattaý, Aqmola oblysynyń Táýelsizdik jyldaryndaǵy mádenı damýy, aýyldyq klýbtar men mádenıet úıleriniń ózekti máseleleri tóńirinde baıandamalar jasalyp, salany serpiltý baǵytynda usynys-pikirler tyńdaldy.
«Memleket basshysy Qasym-Jomart Toqaev «Halyq birligi men júıeli reformalar - eldiń órkendeýiniń berik negizi» atty Qazaqstan halqyna Joldaýynda eldiń áleýmettik-ekonomıkalyq damýynyń aldaǵy kezeńge arnalǵan basym maqsattaryn aıqyndap berdi. Táýelsizdigimizdi jarııalaý arqyly biz osylaısha ata-babalarymyzdyń san ǵasyrlyq armanyn oryndaǵanymyzdy atap ótti. Sonymen qatar, Prezıdent Joldaýynda daryndy jastardyń jobalaryn qoldaýǵa jáne iske asyrýǵa baǵyttalǵan sharalar kesheniniń daıyndalǵanyn jarııalaǵany bizdi qýantpaı qoımady. Halqymyz ejelden tól óneri men mádenıetine erekshe mán berip, ony bizge amanat etti. Bıylǵy jyly Qazaqstan Respýblıkasynyń Mádenıet jáne sport mınıstrligimen «Kókshetaý - Qazaqstannyń mádenı astanasy» bolyp jarııalandy. Biz úshin bul úlken abyroı jáne jaýapkershilik», - dedi kezdesýde Aına Mysyrálimova.
Oblys ákiminiń orynbasary atap ókendeı, Aqmola oblysynda Táýelsizdik jyldary 7 murajaı, 123 kitaphana, 107 klýb ashyldy, onyń ishinde 91 memlekettik. 1991 jyldan beri M. Ǵabdýllınniń jáne «Botaı-Býrabaı» ashyq aspan astyndaǵy murajaılary salyndy. Budan bólek, Shahmet Qusaıynov atyndaǵy Aqmola mýzykalyq-drama teatrynyń ǵımaraty qaıta jańartyldy. Esil aýdanynyń Znamenka jáne Sandyqtaý aýdanynyń Petrovka aýyldaryrynda 2 aýyldyq klýb salyndy. Egindikól aýdany Alakól aýylynda Mádenıet úıi boı kóterdi. Mundaǵy barlyq nysandar demeýshiler esebinen salynyp otyr.
Búgingi tańda Atbasar aýdanynyń Bastaý aýylynda «Aýyl - El besigi» respýblıkalyq jobasy boıynsha turǵyndardyń bos ýaqytyn ótkizetin ortalyqtyń qurylysy júrip jatyr, ony 2021 jyldyń sońyna qaraı aıaqtaý josparlanýda. Qazir óńirde 2 teatr, Úkili Ybyraı atyndaǵy oblystyq fılarmonııa, halyq shyǵarmashylyǵy jáne mádenı demalys ortalyǵy, «Kókshetaý» mádenıet saraıy, 11 murajaı, tarıhı-mádenı murany qorǵaý jáne paıdalaný ortalyǵy, 331 memlekettik kitaphana, 248 memlekettik klýbtyq kásiporyn jumys isteıdi.
Sonymen qatar, oblysta Kóken Shákeev atyndaǵy aqyndar mektebi jumys isteıdi, osy jyldyń qyrkúıek aıynda oblystyq orys drama teatry janynan Jastar teatry ashyldy. «Dástúrli ánder», «Aqyndar ortalyǵy» ortalyǵyn ashý josparlanǵan.
Aıta ketsek, «Sálem, Elorda!» ІІ respýblıkalyq óner sherýi Roza Baǵlanova atyndaǵy «Qazaqkontsert» memlekettik kontserttik uıymy janyndaǵy «Respýblıkalyq kontserttik-gastroldik qyzmet ortalyǵynyń» úılestirýimen ótkizilýde.
