Táýelsizdiktiń 30 jyldyǵyna oraı óńirler jaıly rolıkter serııasy jaryqqa shyǵady
Memlekettik hatshy Qyrymbek Kósherbaevtyń tóraǵalyǵymen Aqordada ótken QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komıssııanyń otyrysynda Aqparat jáne qoǵamdyq damý mınıstri Dáýren Abaev Táýelsizdiktiń 30 jyldyǵyna oraı vıdeorolıkter toptamasy ázirlengenin jetkizdi.
«Sizdiń tapsyrmańyz boıynsha (Memlekettik hatshy Qyrymbek Kósherbaevqa qarata) Táýelsizdiktiń 30 jyldyǵyna oraı Qazaqstan týraly vıdeorolıkter toptamasyn ázirledik. Atap aıtqanda, 7 rolık Qazaqstannyń óńirleriniń sulýlyǵyna arnalǵan. Vıdeorolıkterdiń taǵy bir parasy bizdiń eldiń týrıstik, ınvestıtsııalyq jáne ekologııalyq tartymdylyǵyna arnalǵan. 2019 jyly túsirilim jumystarymen respýblıkalyq mańyzdaǵy úsh qala, sonymen qatar tórt oblys – Almaty, Mańǵystaý, Túrkistan jáne Shyǵys Qazaqstan oblystary qamtyldy», - dedi Aqparat jáne qoǵamdyq damý mınıstri Dáýren Abaev.
Mınıstr túsirilim tobyna barynsha qoldaý bildirgen Shyǵys Qazaqstan oblysynyń ákimdigine alǵysyn bildirdi.
«Olar sheteldikter edi. Shyǵys Qazaqstan oblysynda barynsha kómek kórsetilgenin aıtyp keldi. Qazirgi ýaqytta rolıkterde belgili bir aımaqqa basymdyq berilmeıdi. Tek respýblıkalyq mańyzy bar qalalar atalyp ótedi. Biraq bıyl taǵy 10 oblys boıynsha jumysty jalǵastyrsaq deımiz. Osylaısha, árbir óńir boıynsha jeke rolık ázirlenedi. Osyǵan baılanysty bıyl túsirilim tobyna qoldaý bildirýdi aımaq basshylarynan ótinsem deımin. Ásirese, túsirilim jumystary úshin sátti lokatsııa tańdaýda kómek kerek. Joba úshin kásibıligi joǵary rejısserler men operatorlar tartylyp otyr. Biraq olar sheteldikter. Belgili bir aımaq maqtan tutatyn oryndardy olar bile bermeýi múmkin», - dedi ol.
Mınıstrdiń sózin tyńdaǵan Qyrymbek Kósherbaev qazaqtyń jerin saqtap qalǵan, sol úshin kúresken J.Táshenovti, tanymal ǵalym A.Baraevty óskeleń urpaqqa durystap jetkize bilý kerektigin atap ótti.
Aıta ketsek, onyń aldynda mınıstr «Rýhanı jańǵyrý» baǵdarlamasynyń 2020 jylǵa arnalǵan jańa josparyn tanystyrǵan bolatyn.
