Táýelsizdiktiń 30 jyldyǵyna oraı birqatar qazaqstandyqtarǵa «Halyq alǵysy» medali berildi
NUR-SULTAN. QazAqparat - 2020 jyly Memleket basshysy Q.Toqaevtyń bastamasymen «Halyq alǵysy» arnaıy medali taǵaıyndalǵany belgili. Medalmen bilim berý, densaýlyq saqtaý, áleýmettik qorǵaý salalarynda jemisti jumys isteıtin, sonymen qatar pandemııaǵa qarys kúreske belsene atsalysqan Qazaqstan Respýblıkasynyń azamattary marapttaldy.
Osyǵan oraı, Táýelsizdiktiń 30 jyldyq mereıtoıy qarsańynda Otanymyzdyń órkendeýine qosqan eleýli úlesin kótermelep, qoldaý maqsatynda 2 myńǵa jýyq azamatqa «Halyq alǵysy» medali tabys etildi.
Aıta ketý kerek, ótken Volonter jylynda elimizdiń volonterlik qyzmetine qatysýshylar sany úsh esege ósip, qaıyrymdylyqtyń qarqyny arta tústi. Sondyqtan, bul joly qoǵamdyq belsendilik tanytyp, ásirese qaıyrymdylyq jáne volonterlik qyzmette eńbektengen azamattarǵa basymdyq berildi.
Máselen, Shyǵys Qazaqstan oblysy, Novo-Ýlbınka aýylynyń turǵyny Mıhaıl Fedorov osyndaı ıgi isterdiń aıqyn úlgisindeı. Ol jyldar boıy óz qolymen orman ósirip, 93 jasynda úsh gektar aýmaqty kógaldandyrýmen aınalysyp keledi. Aýyl turǵyndary kórshisin «orman saqshysy» dep atap ketken eken.
Taǵy bir úlgili is retinde qýańshylyqpen kúresý úshin qazaqstandyqtarǵa úndeý tastap, jaz boıy shóp shaýyp, jappaı mal qyrylǵan óńirlerge jibergen erikti Qurmet Bolathannyń eńbegin ataýǵa bolady.
Jeke bastamalarmen qatar shaǵyn jáne orta kásipkerlik ókilderi tarapynan qaıyrymdylyqtaǵy belsendilik jyldan jylǵa artyp keledi. Ashat Soltanov, Vasılıı Palaev, Qasymhan Sháripov, Álııa Túsipbekova jáne Narıman Shaqabaev sııaqty kásipkerlerdiń metsenattyq qyzmeti qaıyrymdylyqtyń úlgisi bolyp tabylady. Olar ekonomıkanyń ósýine úles qosyp qana qoımaı, eldiń ál-aýqatyn arttyrý boıynsha júıeli jumystar júrgizýde.
Eriktilik pen qaıyrymdylyq mysaldarynan basqa, bul joly densaýlyq saqtaý, bilim berý jáne pandemııamen kúreste áli de aldyńǵy qatarda júrgen adamdardyń ómiri úshin mańyzdy basqa da mamandyq ókilderiniń eńbegi nazardan tys qalmady.
Olardyń barlyǵy memlekettik mereke qarsańynda «Halyq alǵysy» medalimen marapattaldy.
Esterińizge sala keteıik, 2020 jyly «Halyq alǵysy» medalimen 5 myńǵa jýyq azamat: onyń ishinde dárigerler, eriktiler, metsenattar, muǵalimder, polıtseıler, TJ qyzmetkerleri, jýrnalıster jáne t. b. marapattalǵan bolatyn.
