Táýelsizdiktiń 30 jyldyǵy: Ulttyq mýzeıde «Ulyq Ulys» zaly ashyldy
«Biz árdaıym keń baıtaq jerimiz ben tereń tarıhymyzdy maqtanyshpen aıta alamyz. Sonyń biri - Altyn Orda kezeńindegi tarıh. Ózderińiz biletindeı, ótken jyly Memleket basshysynyń bastamasymen Altyn Ordanyń mereıtoıyn el bolyp atap óttik. Altyn orda kezeńi men tarıhy birneshe ult ókilderimen baılanysty ekeni aıan. Biraq Altyn Ordanyń qaı jerde qurylǵany jáne ony kimder qurǵany tarıhtan belgili. Onyń ústine tarıhy tereń osynaý ortaǵasyrlyq memlekettiń mereıtoıyn memlekettik deńdeıde alǵash biz atap ótip otyrmyz. Búgingi kórmege biraz qundy dúnıeler qoıylǵan», - dedi QR Ulttyq mýzeıdiń dırektory Arystanbek Muhamedıuly zaldyń ashylý saltanatynda.
Kórmeni uıymdastyrýshylardyń aıtýynsha, mýzeıdiń ǵylymı qyzmetkerleri jańa zalǵa qoıatyn jádigerlerdi izdep, Ulytaýǵa arnaıy ǵylymı saparmen barǵan.
«Altyn Ordanyń negizin qalaýshy - qazaq ulty ekeni anyq. Bul memlekettiń áli de bolsa ashylmaǵan syrlary kóp. Altyn ordaǵa qatysty kóptegen qundy derekter syrtta ekeni de ras. Sondyqtan aldaǵy ýaqytta bizdiń tarıhshylar men ǵalymdar zertteıtin dúnıe jetkilikti», - deıdi ol.
Jańa zalda Ulyq Ulys kezeńiniń mádenıetin, turmys-tirshiligimen tanystyratyn ortaǵasyrlyq qalalardan tabylǵan arheologııalyq artefaktiler, nýmızmatıkalyq toptamalar, dinı-minájattyq ǵımarat maketi men basqa da qundy jádigerler qoıylǵan.
Odan bólek, ekspozıtsııalar arasynda shetel muraǵattarynan tabylǵan handardyń resmı jazbalarynyń kóshirmeleri, memlekettiń rámizi bolyp tabylatyn Ulyq Ulys týynyń qaıta jańǵyrtylǵan nusqasy (Eýropalyq teńiz kartalaryndaǵy málimetterge súıenip) oryn alǵan.
Sonymen birge Ulyq Ulys handarynyń elshilerge, saýdager-kópesterge bergen negizgi senim qujattary - paızylardyń kóshirmesi, Joshy urpaqtarynyń shejiresi (Sol qanat) kópshiliktiń nazaryna usynylyp otyr.
«Táýelsizdiktiń 30 jyldyǵyna oraı osyndaı aıtýly tarıhı sátke kýá bolǵanymyz qýantady. Bul - tarıhı ádilettilik. Sebebi, ózderińiz bilesizder, kezinde Altyn ordaǵa qatysty birshama jańsaq pikirler boldy, tipti bul taqyrypty qozǵaýǵa tyıym da saldy. Endi, mine, tarıhı shyndyqty jańǵyrtyp otyrmyz. Sonaý Altyn Ordanyń kezindegi ulttar, búgingi qyrym, tatar, bashqurttar bizge qyzyǵa da qyzǵana qaraıdy. Sondyqtan biz baı tarıhymyzdy maqtan tutýymyz kerek. Jáne osy baǵyttaǵy jumysty toqtatpaı, jas zertteýshi ǵalymdardy tartyp, jalǵastyrýymyz kerek», - dedi QR Parlamenti Májilisiniń depýtaty Berik Ábdiǵalıuly.
