Táýelsizdiktiń 30 jyldyǵy: Shymkentte Ózbekáli Jánibekovke kompozıtsııalyq músin ornatyldy

ShYMKENT. QazAqparat- Shymkentte qoǵam qaıratkeri, ǵalym-etnograf Ózbekáli Jánibekovtiń kompozıtsııalyq músini ashyldy. Sondaı-aq, qoǵam qaıratkeriniń ómir jolyn baıandaıtyn «Dara» atty derekti fılmniń tusaýy kesildi, dep habarlaıdy QazAqparat tilshisi.

Kompozıtsııalyq músinniń ashylýyna qatysqan qala ákimi Murat Áıtenov kópshilikti táýelsizdik merekesimen quttyqtady.

– Ǵalym-etnograf Ózbekáli Jánibekovtiń mádenıet mınıstrliginde jaýapty qyzmet atqarǵan jyldary elimizde 400-ge jýyq arheologııalyq nysan qalpyna keltirilgenin jaqsy bilemiz. Tarıhymyzdy taný úshin úlken ózgerister jasaldy. Bul Ózbekáli Jánibekovtiń ult qaıratkeri, otanshyl azamat retindegi tulǵasyn kórsetedi, – dedi qala ákimi.

Shymkent qalasynyń ortalyq saıabaǵyna ornatylǵan shaǵyn sáýlet músini Ó.Jánibekovtiń 90 jyldyq mereıtoıyna arnalyp otyr.

Ondaǵy maqsat – ultymyzdyń ulttyq qundylyqtaryn, ómir saltymyzdy zamanǵa saı odan ári baıytýda, salt-dástúr, ádet-ǵuryptarymyz arqyly jańa urpaq tárbıeleýde Ózbekáli Jánibekovtiń bıik tulǵasyn dáripteý.

Sondaı-aq, Shymkent qalasynyń Ádet-ǵuryp jáne salt-dástúr ortalyǵynda qoǵam qaıratkeriniń ómir jolyn baıandaıtyn «Dara» atty derekti fılmniń tusaýy kesildi.

Fılmde qaıratkerdiń ómirlik pozıtsııasy, ulttyq ıdeologııanyń negizin qalaýdaǵy oı-pikir ustanymy, qazaqtyń ómir-salty men bolmys-bitimi, dúnıetanymyn túbegeıli zerttep, qaıta jańǵyrtý jolyndaǵy izdenisteri jáne basqa kóptegen eńbekteri kórsetiledi.

Jınalǵan kópshilik fılmdi tamashalap, Ádet-ǵuryp jáne salt dástúr ortalyǵynyń jumys barysymen tanysty.