Táýelsizdiktiń 30 jyldyǵy: ShQO-da jyl sońyna deıin 40-tan astam nysan ashylmaq
Táýelsizdiktiń 30 jyldyǵyn merekeleýdegi mańyzdy baǵyttardyń biri - óndiris oryndaryn ashý jáne áleýmettik nysandardy paıdalanýǵa berý. ShQO ákiminiń orynbasary Azamat Muhamedchınov osy baǵytta aýqymdy jumys júrgizilip jatqanyn aıtty.
- Jyl basynan beri Óskemende 120 jáne 250 oryndyq eki balabaqsha paıdalanýǵa berildi. Semeıde onkologııalyq aýrýlardy dıagnostıkalaý jáne emdeý úshin elimizdegi alǵashqy ıadrolyq medıtsına ortalyǵy ashyldy. Elorda kúnine oraı óńirde 10 áleýmettik mańyzy bar nysan boı kótergen. Onyń ishinde Semeıdegi perınataldyq ortalyqtyń úshinshi perzenthanasy, Úrjar aýdany Maqanshy aýylyndaǵy 128 oryndyq balabaqsha men sport modýli bar, - dedi ol.
Ulan, Zaısan, Jarma aýdanyndaǵy aýyl turǵyndary jańa páterler men úılerdiń kiltterin alyp, qonys toıyn toılady. Qurylys qarqynynyń artýynyń arqasynda órt kezinde zardap shekken Rıdder turǵyndarynyń bir bóligi jańadan salynǵan úılerdiń kiltterin aldy.
Azamat Muhamedchınov jyl sońyna deıin 47 áleýmettik nysandy, onyń ishinde turǵyn úılerdi paıdalanýǵa berý josparlanyp otyrǵanyn atap ótti.
- Sondaı-aq Aqtoǵaı taý-ken baıytý kombınatynyń ekinshi kezeńin iske qosý da mańyzdy oqıǵalardyń biri bolmaq. Bul Táýelsizdik jyldaryndaǵy aımaqtaǵy eń iri ınvestıtsııalyq joba, - dedi oblys ákiminiń orynbasary.