Táýelsizdiktiń 30 jyldyǵy: ShQO-da Belsendi uzaq ómir ortalyǵy ashyldy

ÓSKEMEN. QazAqparat – Táýelsizdiktiń 30 jyldyǵyna oraı Shyǵys Qazaqstan oblysy Shemonaıha aýdanynda Belsendi uzaq ómir ortalyǵy ashyldy, dep habarlaıdy QazAqparat tilshisi.

Belsendi uzaq ómir ortalyǵy Pervomaıskıı arnaıy áleýmettik qyzmet kórsetý ortalyǵynyń bazasynda ashyldy. Onda kelgen zeınetkerler densaýlyǵyn jaqsartyp, bos ýaqytyn tıimdi ótkizedi. Munda segiz mamandandyrylǵan kabınet, atap aıtqanda eńbek terapııasy, emdik-saýyqtyrý dene shynyqtyrý kabınetteri bar. Sondaı-aq demalys jáne massaj bólmeleri, akt zaly da qarastyrylǵan.

«Ortalyqtaǵy kabınetter jıhazben, mamandandyrylǵan jabdyqpen tolyqtaı qamtamasyz etilgen. Sapaly qyzmet kórsetý úshin qosymsha jumys oryndary qurylatyn bolady. Ortalyqqa kelýshiler úshin kúnine eki ret tamaqtaný uıymdastyrylmaq. Jylyna Belsendi uzaq ómir ortalyǵy 90-ǵa jýyq adamdy qabyldaı alady», - dep habarlady Shemonaıha aýdany Pevromaıskıı kentiniń ákimdigi.

Ortalyqtyń saltanatty ashylýy barysynda ShQO Jumyspen qamtý jáne áleýmettik baǵdarlamalardy úılestirý basqarmasynyń basshysy Almıra Mýsınova jınalǵandardy kele jatqan merekemen quttyqtady. Ol memlekettik saıasattyń basym baǵyttarynyń biri ardagerler men zeınetkerlerge qamqorlyq jasaý, olardyń ómir súrý sapasyn jaqsartý ekenin atap ótti.