Táýelsizdiktiń 30 jyldyǵy: Shetpede 2 kópqabatty turǵyn úı paıdalanýǵa beriledi
Bul elimiz egemendik alǵaly beri aýdanda alǵash ret boı kóteretin kópqabatty turǵynúı. Bul týraly OKQ fılıalynda ótken brıfıngide aýdan ákimi Tilek Kóshmaǵanbetov málim etti.
«Qazirgi ýaqytta 3 qabatty 24 páterlik úıdiń qurylysy kestege sáıkes júrip jatyr. 4 qabatty 72 páterlik baspanany kóterýge kásipkermen kelissóz júrgizildi. Aýktsıon arqyly jer berý máselesi qaraldy. Kópqabatty 2 úı de «Nurly jer» baǵdarlamasy arqyly salynady. Aýdan ákimdigi balansyna alynyp, jańa páterler turǵyn úı kezeginde turǵan azamattarǵa beriledi» - dedi Tilek Kóshmaǵanbetov.
Taǵy bir jańalyq - QR Táýelsizdiginiń 30 jyldyǵy qarsańynda Jyńǵyldy aýylynda bir mezgilde 140 adam shynyǵatyn sport kesheni salynatyn boldy.
«Jobalyq-smetalyq qujaty jasaqtaldy. Memlekettik satyp-alý konkýrsy júrip jatyr. 2 qabatty ǵımarat aýmaǵynda fýtbol, júgirý, sekirý jáne basketbol, voleıbol alańdary ornalasady. Kelýshiler fýtbol, dzıýdo, qazaq kúresi, djıý-djıtsý, jeńil atletıka taǵy basqa sport túrimen aınalysady. Keshen úıirmelerge arnalǵan jáne kıim ilý, jýyný bólmelerimen, jattyǵý zaldarymen qamtylady», - dedi Tilek Kóshmaǵanbetov.